នៅមណ្ឌលសុខភាពផ្សាព្រំ ស្ថិតក្នុងភូមិផ្សាព្រំ ឃុំស្ទឹងកាច់ ស្រុកសាលាក្រៅ នាព្រឹកថ្ងៃទី២៦ ខែមិថុនា ឆ្នាំ២០១៩ ថ្នាក់ដឹកនាំនិងមន្ត្រីនៃមន្ទីរសុខាភិបាលខេត្តប៉ៃលិនបានផ្សព្វផ្សាយអប់រំស្តីពីការប្រើប្រាស់ថ្នាំរំលូតដោយសុវត្ថិភាព ការឆ្លងមេរោគអេស៍ ជំងឺអេដស៍ និងការពន្យាកំណើត ជូនដល់ប្រជាពលរដ្ឋ និងបុគ្គលិកបំរើការងារនៅគ្រឹះស្ថាន កាស៊ីណូ ដែលពិធីស្ថិតក្រោមវត្តមាន លោកគ្រូពេទ្យ អាង នាង ប្រធានមន្ទីរសុខាភិបាល លោក សៀ សុខុម អភិបាលរងស្រុកសាលាក្រៅ និងលោកស្រី ស ចិន្តា ស្នងការរងនគបាលខេត្តប៉ៃលិន ព្រមទាំងមានការអញ្ជើញពីសំណាក់លោកលោកស្រីកងកម្លាំងគ្រប់លំដាប់ថ្នាក់ ព្រមទាំងលោកគ្រូពេទ្យ អ្នកគ្រូពេទ្យ ជាច្រើននាក់ផងដែរ។
បន្ទាប់ពីលោកគ្រូពេទ្យ សាខុន យុទ្ធី បានធ្វើបទបង្ហាញពីស្ថានភាពអេដស៍និងការចំលងមេរោគអេដសន៍និងមេរោគស្វាយ រួចមកអ្នកគ្រូពេទ្យ គា ចាន់ថី និង អ្នកគ្រូពេទ្យលាង ឡាដាត បានធ្វើបទបង្ហាញពីច្បាប់ស្តីពីការរំលូតកូន និងការពន្យាកំណើត ជូនដល់បងប្អូនប្រជាពលរដ្ឋ និងបុគ្គលិកបំរើការងារនៅគ្រឹះស្ថាន កាស៊ីណូ អោយពួកគាត់បានយល់កាន់តែយល់ច្បាស់ ពីការថែររក្សាការពារសុខភាព។
លោក សៀ សុខុម អភិបាលរងស្រុកសាលាក្រៅបានមានប្រសាសន៍ថា៖ការផ្សព្វផ្សាយអប់រំស្តីពីការប្រើប្រាស់ថ្នាំរំលូតដោយសុវត្ថភាព ការឆ្លងមេរោគអេស៍ ជំងឺអេដស៍ និងការពន្យាកំណើត នៅពេលនេះពិតជាមានសារៈសំខាន់ណាស់ចំពោះ បងប្អូនប្រជាពលរដ្ឋ និងបុគ្គលិកបំរើការងារនៅគ្រឹះស្ថាន កាស៊ីណូ ក្នុងការទប់ស្កាត់ ការពារ អោយបានត្រឹមត្រូវ ច្បាស់លាស់ ស្របទៅតាមការណែនាំរបស់ក្រសួងសុខាភិបាល ។ ដូច្នេះ បងប្អូនប្រជាពលរដ្ឋ និងបុគ្គលិកបំរើការងារនៅគ្រឹះស្ថានកាស៊ីណូទាំងអស់ត្រូវស្តាប់ ការវណែនាំ ពីគ្រូពេទ្យ និងលើកជាសំនួរអោយបានផុលផុសចំពោះបញ្ហាដែលកើតមានកន្លងមក ដើម្បីដកពិសោធន៍ ក្នុងការថែរក្សាការពារសុខភាព និងប្រើប្រាស់ថ្នាំ ពេទ្យអោយបានត្រឹមត្រូវ ។ជាមួយគ្នានេះបើសិនមានបញ្ហា រំលូតកូន សង្ស័យថាមានផ្ទុកមេរោគអេដស៍ និងមិនយល់ពីការពន្យាកំណើត សូមបងប្អូនប្រជាពលរដ្ឋទាំងអស់ត្រូវទៅមណ្ឌលសុខភាពដែលនៅជិតខ្លួន ដើម្បីអោយគ្រូពេទ្យពន្យល់ណែនាំ អំពីការពន្យាកំណើតអោយបានត្រឹមត្រូវ។
លោកគ្រូពេទ្យ អាង នាង ប្រធានមន្ទីរសុខាភិបាលខេត្តប៉ៃលិនបានមានប្រសាសន៍ថា៖ ការផ្សព្វផ្សាយអប់រំស្តីពីការប្រើប្រាស់ថ្នាំរំលូតដោយសុវត្ថភាព ការឆ្លងមេរោគអេស៍ ជំងឺអេដស៍ និងការពន្យាកំណើត នៅពេលនេះ ដើម្បីបណ្តុះបណ្តាល និងបង្កើនចំណេះដឹង ដល់បងប្អូនប្រជាពលរដ្ឋនិង បុគ្គលិកបំរើការងារនៅគ្រឹះស្ថានកាស៊ីណូ ក្នុងការចូលរួមចំណែកលើកកម្ពស់សុខមាលភាពឲ្យមានប្រសិទ្ធិភាព ជាពិសេសចូលរួមទប់ស្កាត់ស្រ្តីមានផ្ទៃពោះកុំអោយមានគ្រោះថ្នាក់ដោយរលូតកូន និងការកាត់បន្ថយគ្រោះថ្នាក់ដល់មាតា ។ លោកបានបន្តថា បងប្អូនប្រជាពលរដ្ឋទាំងអស់ ត្រូវយកចំណេះដឹងដែលបានស្តាប់ ទៅអនុវត្តន៍ និងណែនាំបន្តឲ្យយល់ដឹងពីសារៈសំខាន់នៃការថែរក្សាស្រ្តីមានផ្ទៃពោះ និងការប្រើប្រាស់ឱសថឲ្យបានត្រឹមត្រូវ ស្រមតាមគោលនយោបាយរបស់ក្រសួងសុខាភិបាល និងរាជរដ្ឋាភិបាលកម្ពុជាក្នុងការលើកកម្ពស់សុខមាលភាពមាតាទារក។ លោកលើកឡើងថា៖ដើម្បីចូលរួមណែនាំអំពីការប្រើប្រាស់ថ្នាំរំលូតដោយសុវត្ថិភាព ការឆ្លងមេរោគអេស៍ ជំងឺអេដស៍ និងការពន្យាកំណើតជូនដល់បងប្អូនប្រជាពលរដ្ឋអោយបានគ្រប់ៗគ្នា លោកគ្រូអ្នកគ្រូពេទ្យទាំងអស់ត្រូវខិតខំយកចិត្តទុកដាក់បន្តផ្សព្វផ្សាយច្បាប់ និងនិតិវិធី ក្នុងការ ទប់ស្កាត់ ការសង្រ្គោះស្ត្រីកុំឲ្យរំលូតកូន និងការប្រើប្រាស់ថ្នាំរំលូតដោយសុវត្ថភាព ការកាត់បន្ថយអត្រាគ្រោះថ្នាក់លើមាតា និងការទប់ស្កាត់ជំងឺអេដសន៍ក្នុងន័យលើកកម្ពស់ និងបម្រើសេវាជូនប្រជាពលរដ្ឋប្រកបដោយវិជ្ជាជីវៈឲ្យបានត្រឹមត្រូវ ស្របតាមគោលនយោបាយរបស់រាជរដ្ឋាភិបាលកម្ពុជា ។
សូមបញ្ជាក់ថា៖ក្រសួងសុខាភិបាលបានសង្កេតឃើញថាស្រ្តីភាគច្រើននៅកម្ពុជាជួបប្រទះបញ្ហាផ្នែកសុខភាពបន្តពូជនៅឆ្នាំ២០១៤ បានបង្ហាញលទ្ធផលអត្រាស្លាប់របស់ម្តាយជុំវិញកំណើតថយចុះគួរអោយកត់សំគាល់ក្នុងរយៈពេលប៉ុន្មានឆ្នាំចុងក្រោយនេះ។នៅឆ្នាំ២០០៥អត្រាស្លាប់ម្តាយ៤៧២ បានថយចុះដល់២០៦នៅឆ្នាំ២០១០ និងបន្តថយចុះដល់១៧០នៅឆ្នាំ២០១៥លើទារក១សែនកំណើតរស់៕
