ក្រុមការងារថ្នាក់ជាតិចុះជួយមូលដ្ឋានខេត្តប៉ៃលិនប្រជុំត្រៀមរៀបចំធ្វើវេទិកា សាធារណៈនៅក្រុងប៉ៃលិន និងស្រុកសាលាក្រៅ


ព្រឹកថ្ងៃទី២២ ខែកញ្ញា ឆ្នាំ២០១៩ ក្រុមការងារថ្នាក់ជាតិចុះជួយមូលដ្ឋានខេត្តប៉ៃលិនប្រជុំត្រៀមរៀបចំធ្វើវេទិការសាធារណៈនៅក្រុងប៉ៃលិន និងស្រុកសាលាក្រៅ ស្ថិតក្រោមអធិបតីភាពឯកឧត្តមផាន់ ចាន់ធុល អភិបាលខេត្តប៉ៃលិន និងជាអនុប្រធានអចិន្រ្តៃក្រុមការងារថ្នាក់ជាតិចុះជួយមូលដ្ឋានខេត្តប៉ៃលិន និងមានការអញ្ជើញចូលរួមពីសំណាក់ឯកឧត្តមប៉ុញ សច្ចៈ រដ្ឋលេខាធិការក្រសួងធនធានទឹក និងឧតុនិយម និងជាប្រធានក្រុមការ​ងារថ្នាក់ជាតិចុះជួយមូលដ្ឋានក្រុងប៉ៃលិន ឯកឧត្តម ហាប់ អូម៉ាលី រដ្ឋលេខាធិការក្រ​សួងអភិវឌ្ឍន៍ជនបទ និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកសាលាក្រៅ និងឯកឧត្តមលោកជំទាវជាសមាជិកសមាជិការក្រុមការងារថ្នាក់ជាតិចុះជួយមូលដ្ឋា​ន​ខេត្តប៉ៃលិន/ក្រុង/ស្រុក និងលោកលោកស្រីក្រុមលេខាធិការដ្ឋាន ជាច្រើននាក់ផងដែរ។

បន្ទាប់ពីឯកឧត្តមឃ្លោក នួយអភិបាលរងខេត្តប៉ៃលិន​បានអានរបាយការបូកសរុប​អំពីសកម្មភាពការងាររបស់ក្រុមការងារថ្នាក់ជាតិចុះជួយមូលរដ្ឋានខេត្តប៉ៃលិនរួចមក ឯក​ឧត្តមចេង ញ៉ាន់ អភិបាលរងខេត្តក៍បាន​អាចសេចក្តីសម្រេច​ស្តីពីការបង្កើត​ក្រុមលេ​ខា​ធិការ ដើម្បីធ្វើរបាយការណ៍​បូកសរុបសកម្ម​ភាពការងា​ររបស់ក្រុមការងា​រថ្នាក់ជាតិ​ចុះជួយ​មូលដ្ឋាន ក្នុងការត្រួតពិនិត្យនិងគាំទ្រការអនុវត្តកម្មវិធីនយោបាយ និងយុទ្ធសាស្រ្តច​តុ​កោណ​ដំណាក់កាលទី០៤ របស់រាជរដ្ឋាភិបាល នៅខេត្តប៉ៃលិន អោយមានប្រសិទ្ធិភាព​ខ្ពស់។

ឯកឧត្តមផាន់ ចាន់ធុល អភិបាលខេត្តប៉ៃលិន និងជាអនុប្រធានអចិន្រ្តៃក្រុមការងារថ្នាក់ជាតិចុះជួយមូលដ្ឋានខេត្តប៉ៃលិន បានមានប្រសាសន៍ថា៖កិ​ច្ចប្រជុំនៅពេលនេះដើម្បី​ត្រៀមរៀបចំវេទិការណ៍សាធារណៈ នៅក្រុងប៉ៃលិន និងស្រុកសាលាក្រៅ និងបែងចែក​ប្រគល់ភារៈកិច្ចជូនដល់សមាជិកសមាជិការក្រុមការងារថ្នាក់ជាតិចុះជួយមូលដ្ឋាន ឆ្លើយ​តបទៅ​នឹងសេចក្តីត្រូវការ សំនូមពរ សំណើរ និងបញ្ហាប្រឈមនានាក្នុងមូល​ដ្ឋានរបស់​បង​ប្អូន​ប្រជាពលរដ្ឋ ធ្វើការដោះស្រាយអោយបានសមស្របតាមគោល​នយោបាយរបស់​រាជរដ្ឋាភិបាលអោយមានប្រសិទ្ធិភាព ជាមួយគ្នានេះរៀបចំផែនការប្រជុំជារៀងរាល់ខែ ដើម្បីដកស្រង់សកម្មភាពការងារ ធ្វើរបាយការណ៍ទៅថ្នាក់លើពិនិត្យ ។ឯកឧត្តម​លើក​ឡើងថា៖ការរៀបចំវេទិការសាធារណៈជាមួយប្រជាពលរដ្ឋនៅតាមសហគមន៍នានានៅមូលដ្ឋាន មានគោលបំណង និងសំណូមពរសំខាន់ៗ រួមមាន៖១/លើក​កម្ពស់​​ការ​ផ្សារ​ភ្ជាប់​ទំនាក់ទំនងរវាងប្រជាពលរដ្ឋជាមួយរាជរដ្ឋាភិបាល តាមរយៈ​សកម្ម​ភាព​​របស់ថ្នាក់ដឹកនាំ មន្រ្តីរាជការគ្រប់លំដាប់ថ្នាក់ ក្នុង​ការ​ជួបប្រាស្រ័យ​ផ្ទាល់​ជាមួយ​ប្រ​ជា​ពលរដ្ឋគ្រប់មជ្ឈដ្ឋាន ដើម្បីស្វែងយល់អំពីជីវភាពរស់នៅ និងស្តាប់នូវកង្វល់ សំណើរ សំណូមព និងបញ្ហា​​ប្រ​ឈម​នាននៅតាមមូលដ្ឋាន។ទី២/ផ្សព្វផ្សាយអំពីកម្មវិធីនយោបាយ និងសមិទ្ធផលនានា​របស់រាជរដ្ឋាភិបាល ជូនប្រជាពលរដ្ឋបានជ្រាប និងស្វែងរកការគាំទ្រ និងចូលរួម​អនុវត្ត​កម្ម​វិធី​នយោបាយនោះ។ទី៣/ដោះស្រាយ និងបូកសរុបសំណើរ សំណូមពរ បញ្ហាប្រឈម​នានានៅមូលដ្ឋាន ដើម្បីកំណត់ទិសដៅ វិធានការដោះស្រាយ ឆ្លើយតបនឹងតម្រូវកា​ររបស់​ប្រជាពលរដ្ឋ។ ដូច្នេះសូមអោយ​សមាជិកសមាជិកា​ក្រុមការងារ​ថ្នាក់ជាតិចុះជួយ​មូលដ្ឋាន​ខេត្ត​ប៉ៃលិនទាំងអស់ត្រូវចូលរួមសហការគាំទ្រ និងអនុវត្តតាមកម្មវិធីគោល​នយោបាយ​របស់រាជរដ្ឋាភិបាល និងយុទ្ធសាស្រ្តចតុកោណដំណាក់កាលទី០៤ របស់រាជរដ្ឋាភិ​បាលអោយមានប្រសិទ្ធិ និងជោគជ័យ។