(04-02-2016) ប៉ៃលិន៖ នៅសាលប្រជុំក្រុមប្រឹក្សាខេត្តប៉ៃលិន ថ្ងៃទី៤ ខែកុម្ភះ ឆ្នាំ២០១៦ មានកិច្ចប្រជុំសាមញ្ញលើកទី២១អាណត្តទី២របស់ក្រុមប្រឹក្សាខេត្តដែលកិច្ចប្រជុំនេះស្ថិតក្រោមអធិបតីភាព ឯកឧត្តម ឡី ចាន់ឆាយ ប្រធានក្រុមប្រឹក្សាខេត្ត ឯកឧត្តម កើត សុធា អភិបាលនៃគណៈអភិបាលខេត្ត និងមានការអញ្ជើញចូលរួមពីសំណាក់ សមាជិកក្រុមប្រឹក្សាខេត្ត អភិបាលរងខេត្ត ព្រមទាំងលោកប្រធាន អនុប្រធានមន្ទីរ អង្គការស្ថាប័នជំវិញខេត្ត ព្រមទាំងកងកំលាំងប្រដាប់ផងដែរ។
កិច្ចប្រជុំនេះធ្វើឡើងតាមរបៀបវរៈគឺៈ ទី១/ ពិនិត្យ និងអនុម័តរបៀបវារៈកិច្ចប្រជុំសាមញ្ញលើកទី២១។ទី២/ពិនិត្យ និងអនុម័តកំណត់ហេតុកិច្ចប្រជុំសាមញ្ញលើទី២០។ទី៣/ពិនិត្យ និងអនុម័តរបាយការណ៏ស្តីពីការអនុវត្តការងាររបស់រដ្ឋបាលខេត្តប្រចាំខែមករា ឆ្នាំ២០១៦ និង ទី៤/ បញ្ហាផ្សេងៗ។
បន្ទាប់ពីលោក យឹម ភារុណ ប្រធានការិយាល័យលេខាធិការក្រុមប្រឹក្សាខេត្តបានអានកំណត់ហេតុកិច្ចប្រជុំសាមញ្ញលើកទី២០រួចមក កិច្ចប្រជុំក៏បានពិភាក្សា និងលើកឡើងពីបញ្ហាប្រឈមនានាដែលកើតមានឡើង ដូចជា៖ទី១/បញ្ហាការផ្តល់សេវាសាធារណៈជូនដល់បងប្អូនប្រជាពលរដ្ឋនៅមានភាពយឺតយាវ។ ទី២/ប្រជាពលរដ្ឋមួយចំនួនញៀនល្បែងហើយទៅលេងល្បែងនៅការស៊ីណូនិងលេងកន្ទុយលេខនៅតាមសហគមនៅតែកើតមាន។ទី៣/បញ្ហាគ្រឿងញៀននៅតែមានអ្នកប្រើប្រាស់ចែកចាយ។ទី៤/បញ្ហាមន្ត្រីនគរបាលអន្តោប្រវេសន៍ឈូសឆាយដីភ្នំក្រោយកាស៊ីណូធ្វើជាកម្មសិទ្ធ។ទី៥/តម្លៃកសិផលធ្លាក់ចុះធ្វើអោយប្រជាពលរដ្ឋ ជំពាក់លុយធានាគារ។ទី៦/បញ្ហាខ្សែភ្លើងស្រាតចាប់ពីផ្សាព្រំមកដល់ទីប្រជុំជនប៉ៃលិនធ្វើអោយបងប្អូនប្រជាពលរដ្ឋភ័យខ្លាចមានគ្រោះថ្នាក់។
ឯកឧត្តម កើត សុធា អភិបាលខេត្តប៉ៃលិនមានប្រសាសន៏កោតសរសើដល់មន្ទីរជំនាញពាក់ព័ន្ធក្នុងខេត្តទាំងអស់បានខិតខំដោះស្រាយបញ្ហាដែលកើតមានឡើងនៅក្នុងខេត្តប៉ៃលិនបានលទ្ធផលល្អ។ ដូច្នេះ ដើម្បីបំរើការងារផ្តល់សេវាសាធារណៈជូនប្រជាពលរដ្ឋអោយកាន់តែមានប្រសិទ្ធភាពខ្ពស់ ស្របតាមគោលនយោបាយរបស់រាជរដ្ឋាភិបាល ថ្នាក់ដឹកនាំ មន្ត្រីរាជការគ្រប់មន្ទីរ ស្ថាប័នទាំងអស់ ត្រូវបន្តខិតខំបំពេញការងារតាមតួនាទីរបស់ខ្លួន និងចូលរួមផ្សព្វផ្សាយអោយដល់មូលដ្ឋានអំពីផលបះពាល់នៃការប្រើប្រាស់ជួញដូគ្រឿងញៀន ការគោរពច្បាប់ចរាចរណ៏ផ្លូវគោកថ្មីពង្រឹងការអនុវត្តគោលនយោបាយ ភូមិឃុំមានសុវត្ថិភាព និងជំរុញការធ្វើអត្តសញ្ញាណប័ណ្ណជូន បងប្អូនប្រជាពលរដ្ឋនៅតាមមូលដ្ឋានអោយបានគ្រប់ៗគ្នាដើម្បីអោយពួកគាត់យកទៅប្រើប្រាស់ក្នុងការចុះឈ្មោះបោះឆ្នោតនាពេលខាងមុខ ។
ឯកឧត្តម ឡីចាន់ឆាយ ប្រធានក្រុមប្រឹក្សាខេត្តបានណែនាំដល់សមាជិកក្រុមប្រឹក្សា រដ្ឋបាលខេត្ត និងមន្ទីរអង្គភាពស្ថាប័នជំនាញទាំងអស់ត្រូវចូលរួមសហការគ្នាបន្តដោះស្រាយបញ្ហាដែលកើតមានឡើង អោយបានល្អជាបន្តបន្ទាប់ ជាពិសេសត្រូវចេះបញ្ចេញមតិនិងផ្លាស់ប្តូយោបល់គ្នាទៅវិញទៅមកក្នុងន័យស្ថាបនា។ឯកឧត្តមបន្តថា៖ថ្នាក់ដឹកនាំ មន្ត្រីរាជការ អង្គភាពមន្ទីរ ស្ថាប័នទាំងអស់ត្រូវយកចិត្តទុកដាក់អនុវត្តការងារជំនាញដែលរាជរដ្ឋាភិបាលប្រគល់ជូនអោយបានល្អ ហើយត្រូវពង្រឹងសាមគ្គីភាពឯកភាពគ្នា ចេះជួយគ្នាទៅវិញទៅមកនៅពេលប្រជាពលខ្វះខាតជួបការលំបាក ក្នុងការរស់នៅប្រចាំថ្ងៃ ។ទន្ទឹមនេះសមត្ថកិច្ចពាក់ព័ន្ធទាំងអស់ត្រូវបន្តកិច្ចសហការគ្នាពង្រឹងកិច្ចការពារសន្តិសុខសណ្តាប់ធ្នាប់ជូនប្រជាពលរដ្ឋអោយបានជាប្រចាំ ទប់ស្កាត់ចោរលួចចោរប្លន់ ជាពិសេសត្រូវត្រួតពិនិត្យមើលច្បាប់ចរាចរណ៏ថ្មីនេះអោយបានច្បាស់លាស់ដើម្បីធ្វើការផ្សព្វផ្សាយដល់បងប្អូនប្រជាពលរដ្ឋទទួលបានប្រសិទ្ធភាព។
vv [youtube id= “id5qitymhpo”]
