(28-04-2016) ប៉ៃលិន៖ ថ្ងៃទី២៨ ខែមេសា ឆ្នាំ២០១៦ ឯកឧត្តម អ៊ី ឈាន ប្រធានកិត្តិយសសាខាកាកបាទក្រហមកម្ពុជាខេត្តប៉ៃលិន លោកជំទាវ បាន ស្រីមុំ អ្នកតំណាងរាស្រ្តមណ្ឌលខេត្តប៉ៃលិន និងជាប្រធានគណៈកម្មាធិការសាខាកាកបាទក្រហមកម្ពុជាខេត្ត រួមនឹងក្រុមការងារកាកបាទក្រហមខេត្ត បានអញ្ជើញចុះបន្តចែកទឹកស្អាត និងប៊ីដុងទឹក ជូនដល់ប្រជាពលរដ្ឋក្នុងភូមិចំនួន៣ភូមិ ក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
ប្រជាពលរដ្ឋទាំង៣ភូមិដែលទទួលបានទឹកស្អាត និងប៊ីដុងទឹកនាឱកាសនោះមាន ភូមិភ្នំក្រិញ ភូមិអន្លង់រក្សា និងភូមិ អូរកន្ធាងវ៉ា សរុបមានប្រជាពលរដ្ឋចំនួន ២៨៧គ្រួសារ និងបានចែកជូនទឹកសំរាប់ប្រើប្រាស់ដល់ប្រជាពលរដ្ឋអស់ទឹកចំនួន ៨៤៤០០លីត្រ ក្នុងនោះមានទឹកសំរាប់ប្រើប្រាស់ចំនួន៨២០០០លីត្រ និងទឹកសុទ្ធ សំរាប់បរិភោគចំនួន២៤០០លីត្រ។
ឯកឧត្តម អ៊ី ឈាន លោកជំទាវ បាន ស្រីមុំ បានមានប្រសាសន៍ពាំនាំការសាកសួរសុខទុក្ខ ការអាណិតអាសូរ ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនចំពោះបងប្អូនប្រជាពលរដ្ឋទាំងអស់ ដែលកំពុងជួបប្រទះបញ្ហាគ្រោះរាំងស្ងួត ខ្វះខាតទឹកប្រើប្រាស់។ ឯកឧត្តម អ៊ី ឈានបានមានប្រសាសន៍ថា គ្រោះរាំងស្ងួត ខ្វះខាតទឹកប្រើប្រាស់នេះ បានកើតឡើងនៅទូទាំងប្រទេស ហើយសម្តេចអគ្គមហាសេនាបតីតេជោ ហ៊ុន សែន ក៏បានណែនាំដល់កាកបាទក្រហមកម្ពុជា អាជ្ញាធរមូលដ្ឋានគ្រប់ជាន់ថ្នាក់ កងកំលាំងប្រដាប់អាវុធ មន្រ្តីរាជការ និងគណបក្សនយោបាយទាំងអស់ ត្រូវរួមគ្នាជួយដោះស្រាយ នាំយកទឹកចែកជូនបងប្អូនប្រជាពលរដ្ឋ អោយពួកគាត់បានប្រើប្រាស់ ទាន់ពេលវាលា។ ជាក់ស្តែងនៅក្នុងឱកាសនេះ ក្រុមការងារសាខាកាកបាទក្រហមខេត្តដែលមានឯកឧត្តម អ៊ី ឈាន ជាប្រធានកិត្តិយស លោកជំទាវ បាន ស្រីមុំ អ្នកតំណាងរាស្រ្តមណ្ឌលខេត្តប៉ៃលិន និងប្រធានគណៈកម្មាធិការសាខាកាកបាទក្រហមកម្ពុជាខេត្ត បាននាំយកទឹកសំរាប់ប្រើប្រាស់ និងទឹកសុទ្ធសំរាប់បរិភោគ មកចែកជូនដល់បងប្អូនប្រជាពលរដ្ឋ នៅក្នុងភូមិ ភ្នំក្រិញ អន្លង់រក្សានិង ភូមិអូរកន្ធាងវ៉ានេះ ដើម្បីសំរួលដល់ការលំបាកក្នុងការខ្វះខាតទឹកប្រើប្រាស់របស់ប្រជាពលរដ្ឋ ក្នុងពេលកំពុងជួបគ្រោះរាំងស្ងួតនាពេលនេះ។ ឯកឧត្តម បានបន្តថា ការចែកចាយទឹកស្អាតជូនប្រជាពលរដ្ឋនេះមិនមែនធ្វើតែក្នុងពេលនេះ ហើយក៏មិនមែនចែកជូនតែបងប្អូនប្រជាពលរដ្ឋនៅក្នុងភូមិទាំងបីនេះដែរ គឺយើងបានធ្វើជាច្រើនថ្ងៃកន្លងមកហើយ និងនៅមានបន្តចែកទឹកទៅថ្ងៃខាងមុខៗទៀត នៅតាមភូមិ ឃុំនានាទូទាំងខេត្តដែលកំពុងមានបញ្ហាខ្វះខាតទឹកប្រើប្រាស់។ ឯកឧត្តមបានបន្តថា នៅចំនុចឃុំស្ទឹងត្រង់នេះ គឺងាយរងគ្រោះធម្មជាតិណាស់ ពេលមានភ្លៀងខ្លាំង បង្កើតបានជាទឹកជំនន់ ជន់លិចផ្ទះប្រជាពលរដ្ឋ ពេលមានអាកាសធាតុក្តៅហួតហែងខ្វះទឹកប្រើប្រាស់ គឺឃុំស្ទឹងត្រង់ងាយទទួលរងគ្រោះធម្មជាតិជាងឃុំផ្សេងៗ។
vv
[youtube id= “qNMC33CddNE”]
