អភិបាលខេត្តប៉ៃលិនអញ្ជើញអោយភ្លើងបូជាសព លោកស្រី ឃាង ធីរ៉ាផន នាយករងទីចាត់ការហិរញ្ញវត្ថុសាលាខេត្ត


នៅវត្តពោធិមារាម(ហៅវត្តប៉ាហ៊ី) ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន, ព្រឹកថ្ងៃទី០៣ ខែកញ្ញា ឆ្នាំ២០១៨ ឯកឧត្តម ផាន់ ចាន់ធុល អភិបាលនៃ​គណៈ​អភិបាលខេត្តប៉ៃលិន ,ឯកឧត្តម កើត សុធា ទីប្រឹក្សារាជរដ្ឋភិបាល និង ឯកឧត្តម ឡី ចាន់ឆាយ ប្រធានក្រុមប្រឹក្សាខេត្ត បានអញ្ជើញអោយភ្លើងបូជាសព លោកស្រី ឃាង​ធីរ៉ាផន នាយករងទីចាត់ការហិរញ្ញវត្ថុ​សាលាខេត្ត និងត្រូវជាភរិយាលោក សៀក ​រតនៈ អនុប្រធានមន្ទីរសុខាភិបាលខេត្ត។ ក្នុងឱកាសនោះក៏មានការអញ្ជើញចូលរួមពីសំណាក់ ឯកឧត្តម លោកជំទាវ អភិបាល​រងខេត្ត លោកនាយក នាយករងរដ្ឋបាលសាលាខេត្ត លោក លោកស្រី ប្រធានអនុប្រធានមន្ទីរ មន្រ្តីរាជការក្នុងខេត្ត និងញាតិមិត្តជិតឆ្ងាយ​ជាច្រើន​នាក់ផងដែរ។

លោកទឹម ស៊ីថន បានអានជីវប្រវត្តិ និងវិយោឝកថា អោយដឹងថា ៖ លោកស្រី ឃាង ធីរ៉ាផន កើត​នៅថ្ងៃទី៣០ ខែតុលា ឆ្នាំ១៩៧៨ នៅភូមិទឹកល្អក់ ឃុំទឹកល្អក់ ខណ្ឌទួលគោក រាជធានីភ្នំពេញ។ បច្ចុប្បន្នរស់នៅផ្លូវលេខ៥៧ ភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន, កំរិតវប្បធម៌ៈ ចប់​ បរិញ្ញាបត្រជាន់ខ្ពស់ នៅសាកលវិទ្យាល័យគ្រប់គ្រង​ និងសេដ្ឋកិច្ចខេត្ត​បាត់ដំបង ​ផ្នែកគ្រប់គ្រងទូទៅ ចំពោះ​ផ្នែកភាសាបរទេស​។​ លោកស្រីបានបានបញ្ចប់​ និង​ទទួល​បានសញ្ញាបត្របញ្ជាក់កំរិតUpper intermediate នៅវិទ្យាស្ថានគ្រប់គ្រង និងសេដ្ឋកិច្ច ខេត្តបាត់ដំបង។ លោកស្រី បានចូលបម្រើការងារក្នុងក្រមខ័ណ្ឌរដ្ឋនៅថ្ងៃទី១៥ ខែតុលា ឆ្នាំ១៩៩៧ បច្ចុប្បន្នទទួលមុខតំណែងជានាយករងទីចាត់ការហិរញ្ញវត្ថុ នៅក្នុងសាលាខេត្តប៉ៃលិន ប្រភេទក្របខ័ណ្ឌមន្រ្តីជាន់ខ្ពស់ ឋានន្តរស័ក្កិអនុមន្ត្រីថ្នាក់លេខ៣។ លោកស្រីមាន​ កូន៣នាក់ក្នុងបន្ទុក ស្រី ១នាក់ ,ប្រុស ២នាក់ , មានឪពុកបង្កើតឈ្មោះ ឃាង ខាអុន នៅរស់ ស្រុកកំណើត ភូមិដីដុះ សង្កាត់កំពង់ចាម ក្រុងកំពង់សៀម ខេត្តកំពង់ចាម។ ម្តាយឈ្មោះ ឆែ យូឃាង នៅរស់ស្រុកកំណើត ភូមិទ្រាន ឃុំទ្រាន ស្រុកកំពង់សៀម ខេត្តកំពង់ចាម។

ឯកឧត្តម ផាន់ ចាន់ធុល អភិបាលនៃគណៈអភិបាលខេត្តប៉ៃលិនបានសំដែងនូវការ​ចូល​រួម​រំលែក​ទុក្ខ​យ៉ាងគ្រៀមក្រំបំផុត ​ជាមួយក្រុមគ្រួសារនៃសព ចំពោះការ​បាត់បង់ភវិយា​ដ៏ឧតុង្គឧត្តម និងជាម្តាយ,ជាកូន ដ៏ល្អប្រពៃចំពោះក្រុមគ្រូសារ និងសាច់ញាតិ។ ការបាត់បង់លោកស្រី​ ឃាង​ ធីរ៉ាផន គឺជាការបាត់បង់នូវធនធានមនុស្សដ៏ល្អ​ម្នាក់ ​ដែលធ្លាប់​មានស្នាដៃ គុណសម្បត្តិយ៉ាងច្រើនក្នុងការបំរើជាតិ ប្រជាជនកន្លងមក។ឯកឧត្តមបានបន្តថា  ក្នុងនាមជារដ្ឋបាលសាលាខេត្ត ព្រមទាំងមន្រ្តីរាជការទាំងអស់គ្នា​សូមគោរពវិញ្ញាណ​ក្ខន្ធ​របស់លោកស្រី និងសូមបួងសួង សូម​អោយវិញ្ញាណក្ខន្ធរបស់លោកស្រី​ទៅកាន់សុខតិភព​កុំបីឃ្លៀងឃ្លាតឡើយ។ ក្នុងឱកាស នោះឯកឧត្តមក៏បាន ប្រគល់ថវិកាចំនួន២០​លានរៀល​សំរាប់កម្មវិធីបុណ្យសពផងដែរ។

សូមបញ្ជាក់ថា៖ លោកស្រី ឃាង ធីរ៉ាផន បានទទួលមរណៈភាពដោយ​សារគ្រោះ​ថ្នាក់ចរាចរណ៍នៅស្រុកពោណាំរ៉ន ខេត្តចាន់បូរី ប្រទេសថៃ កាលពីថ្ងៃទី៣១ ​ខែ​សីហា ឆ្នាំ​២០១៨ វេលាម៉ោង ២០:៥៤នាទីយប់៕