ដាច់ខ្សែរ៉តនៅសំណង់សណ្ឋាគារ និងកាស៊ីណូ Diamond Crown បណ្តាលឱ្យស្លាប់មនុស្សចំនួន ០៤នាក់ និងរបួសធ្ងន់ ០១នាក់


កាលពីវេលាម៉ោង​ ៧:១៥នាទីព្រឹក ថ្ងៃទី០៤​ ​ខែកញ្ញា​ ឆ្នាំ២០១៨​ មានករណីដាច់ខ្សែរ៉ត ធ្លាក់​មកក្រោម​ បណ្ដាលឲ្យមនុស្សស្លាប់ចំនួន​ ​០៤នាក់​ និងរបួសធ្ងន់ចំនួន​ ០១នាក់​ នៅចំណុចការដ្ឋាន​សំណង់សណ្ឋាគារ​ Diamond Crown​ និងកាស៊ីណូ ស្ថិតក្នុងភូមិផ្សារព្រំ​ ឃុំស្ទឹងកាច់​ ស្រុកសាលាក្រៅ​ ខេត្តប៉ៃលិន។​

បើតាមប្រភពពីសមត្ថកិច្ច បានឱ្យដឹងថា៖ ជនរងគ្រោះ ទាំងនាក់ ៥នាក់ គឺ ទី១- ឈ្មោះ លីម វែង ប្រុស អាយុ 18 ឆ្នាំ រស់នៅ ស្រុកសន្ទុក ខេត្តកំពង់ធំ របួស បាក់ជើង បាក់ដែ និង គ្រោះថ្នាក់ក្បាលធ្ងន់ធ្ងរ (ស្លាប់នៅមន្ទីរពេទ្យបង្អែក) ទី២-ឈ្មោះ តន ភេទ ប្រុស អាយុ 29 ឆ្នាំ រស់នៅភូមិបឹងរាំង ស្រុកកំរៀង ខេត្តបាត់ដំបង របួស បាក់ឆ្អឹងជើងទាំងពីរ (ត្រូវយកទៅ X-ray ) ទី៣-ឈ្មោះ ធោន កក ប្រុស អាយុ 19ឆ្នាំ រស់នៅស្រុកសន្ទុក ខេត្ត កំពង់ធំ (ស្លាប់) ទី៤-ឈ្មោះ ប្រាក់ ឃឿន ប្រុស អាយុ 38ឆ្នាំ រស់នៅខេត្តបន្ទាយមានជ័យ (ស្លាប់) និងទី៥-ឈ្មោះ  បុរី  ភេទ ប្រុស អាយុ២៣ ឆ្នាំ រស់នៅស្រុកប្រសាទសំបូរ ខេត្តកំពង់ធំ ( ស្លាប់)។

បើតាមប្រភពកម្មករក្នុងការដ្ឋានបានរៀបរាប់ថា៖ នៅព្រឹកនេះកម្មករចាប់ផ្តើមធ្វើការជាធម្មតា លុះវេលាម៉ោងកើតហេតុខាងលើ មានកម្មករ ១ក្រុម មានគ្នា ៥នាក់ ឡើងទៅការដ្ឋានជាន់លើ ដោយជិះរ៉តយោង លុះដល់ជាន់ទី៧ ក៍ដាច់ខ្សែររ៉តធ្លាក់មកតែម្តង។

បើតាមសន្និដ្ឋានរបស់សមត្ថកិច្ច បានឱ្យដឹងថា៖ ករណីគ្រោះថ្នាក់នេះ កើតឡើងបណ្តាលមកពី ម្ចាស់ការដ្ឋានសំណង់មានការធ្វេសប្រហែស និងមិនមានការប្រុងប្រយ័ត្នខ្ពស់ ដោយប្រើប្រាស់រ៉តសម្រាប់កម្មករជិះ ឡើងចុះអាគារខ្ពស់រហូត ១២ជាន់ ដែលមិនមានសុវត្ថិភាព។

បច្ចុប្បន្ន​សពជនរងគ្រោះត្រូវបានក្រុមគ្រួសារយកទៅធ្វើបុណ្យតាមប្រពៃណី​ ចំណែកជនរងគ្រោះរងរបួសធ្ងន់បញ្ជូនទៅកាន់មន្ទីរពេទ្យបង្អែកខេត្តដើម្បីព្យាបាល​ និងសង្គ្រោះបន្ទាន់៕