សហភាពសហព័ន្ធយុវជនកម្ពុជាខេត្តប៉ៃលិន ជួយសាងសង់ផ្ទះជូនដូនចាស់ អាយុ ៧៨ឆ្នាំ ដែលមានជីវភាពទីទាល់ក្រ គ្មានទីពឹង


ថ្ងៃទី០៦ ខែកញ្ញា ឆ្នាំ២០១៨ សហភាពសហព័ន្ធយុវជនកម្ពុជាខេត្តប៉ៃលិន ដឹក​នាំដោយ ឯកឧត្តម សៅ សារ៉ាត់ ក្នុងនាមលោកជំទាវ បាន ស្រីមុំ  ប្រធានសហភាព​សហព័ន្ធ​យុវជនកម្ពុជាខេត្ត និងជាអ្នកតំណាងរាស្ត្រមណ្ឌលប៉ៃលិន អណត្តិទី៦ បានជួយសាងសង់ផ្ទះ​ជូនលោកយាយ យឹម អេង អាយុ ៧៨ឆ្នាំ ដែលមានជីវភាពទីទាល់ក្រ គ្មានទីពឹង រស់នៅ​ភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។

ឯកឧត្តម សៅ សារ៉ាត់ ក្នុងនាមលោកជំទាវ បាន ស្រីមុំ  បានមានប្រសាសន៍​ថា៖ បើទោះជា លោកជំទាវ បាន ស្រីមុំ មាន​ការមមាញឹកក្នុងការងារក្តី តែលោកមិនដែល​ភ្លេច ពីទុក្ខ​លំបាករបស់បងប្អូនប្រជាពលរដ្ឋ​នៅក្នុងខេត្តនោះឡើយ និងបានខិតខំគៀង​គររកសប្បុរសជន និងការចូលរួមពីគ្រមមជ្ឍដ្ឋាន ដើម្បីជួយឧបត្ថម្ភគាំទ្រ ដល់បងប្អូន​ប្រជាពលរដ្ឋទីទាល់ក្រ ជួបការលំបាកក្នុង​ជីវភាពរស់​នៅ។ ឯកឧត្តម សៅ សារ៉ាត់ ក៍បាន​មានប្រសាសន៍ជំរុញដល់ ក្រុមយុវជន ស.ស.យ.ក ទាំងអស់ ត្រូវខិតខំបង្កើន​សមត្ថភាព និងមានសាមគ្គីភាព ប្រកប​ដោយឆន្ទះមុះមុត ដើម្បី​បំពេញការងាររបស់ខ្លួនជាច្រើនទៀត អោយ​ទទួល​បានជោគជ័យ។

សូមបញ្ជាក់ថា៖ ផ្ទះដែល យុវជន ស.ស.យ.ក ខេត្ត ជួយសាងសង់ជូនលោកយាយ យឹម អេង គឺមានទទឹង ៤ម៉ែត្រ បណ្តោយ ៥ម៉ែត្រ ធ្វើពីឈើ ប្រក់ស័ង្កសី ដោយចំណាយ​ថវិកា​ផ្ទាល់របស់លោកជំទាវ បាន ស្រីមុំ អ៊ី ឈាន៕ វួច ពឿន