ថ្ងៃទី២៩ ខែកញ្ញា ឆ្នាំ២០១៨ ក្រុមការងារគណបក្សប្រជាជនកម្ពុជាចុះជួយឃុំសាលាក្រៅបានរៀបចំកិច្ចប្រជុំជ្រើសរើសភ្នាក់ងារតំណាងគណបក្សប្រជាជនកម្ពុជាក្នុងឃុំសាលាក្រៅ សំរាប់ ចូលរួមសង្កេតការចុះឈ្មោះបោះឆ្នោត។ កិច្ចប្រជុំនេះស្ថិតក្រោមអធិបតីភាពលោក រាម សុមាន ប្រធានក្រុមការងារគណបក្សប្រជាជនកម្ពុជាចុះជួយឃុំសាលាក្រៅ និងមានលោក- លោកស្រីប្រធាន អនុប្រធានក្រុមការងារចុះជួយភូមិ មកពីមន្ទីរសេដ្ឋកិច្ច និងហិរញ្ញវត្ថុខេត្ត, មន្ទីរផែនការខេត្ត, មន្ទីរធនធានទឹក, មន្ទីរវប្បធម៌ និងវិចិត្រសិល្បៈ, សមាជិកក្រុមប្រឹក្សារស្រុក ក្រុមប្រឹក្សាឃុំ និងភូមិសរុបប្រមាណជា៤០នាក់ បានអញ្ជើញចូលរួម។
លោក រាម សុមាន ប្រធានក្រុមការងារគណបក្សប្រជាជនកម្ពុជាចុះជួយឃុំសាលាក្រៅបានមានប្រសាសន៍ថាៈ កិច្ចប្រជុំនាពេលនេះ ក្រៅអំពីការជ្រើសរើសភ្នាក់ងារតំណាងគណបក្ស ដើម្បីចូលរួមសង្កេតការចុះឈ្មោះបោះឆ្នោត យើងក៏មានលើកយកបញ្ហាប្រឈមនានារបស់ប្រជាពលរដ្ឋក្នុងឃុំសាលាក្រៅមកពិនិត្យ និងពិភាក្សាដោះស្រាយ , ពិនិត្យសភាពការណ៍នយោបាយក្នុងដំណាក់កាលថ្មី, ពង្រឹងការងារភូមិឃុំមានសុវត្ថិភាព, រៀបចំការងារចុះឈ្មោះបោះឆ្នោត, រៀបចំពិធីថ្លែងអំណរគុណចំពោះសមាជិក សមាជិការ និងប្រជាពលរដ្ឋ ដែលបានផ្តល់ទម្នុកចិត្តបោះឆ្នោតគាំទ្រគណបក្សប្រជាជនកម្ពុជា, ការងារធ្វើស្ថិតិចំនួនយុវជន យុវនារីទើបគ្រប់អាយុត្រូវធ្វើអត្តសញ្ញាណបណ្ណ័សញ្ជាតិខ្មែរ និងការងារបន្តធ្វើបច្ចុប្បន្នភាពសមាជិកគ្រួសារបក្សប្រជាជនកម្ពុជាក្នុងឃុំសាលាក្រៅ៕ ដោយៈ វួច ពឿន
