ព្រឹកថ្ងៃទី១២ ខែតុលា ឆ្នាំ២០១៨ នៅអធិការដ្ឋាននគបាលក្រុងប៉ៃលិន មានរៀបចំពិធីប្រកាសផ្ទេរភារកិច្ច មន្រ្តីនគរបាលចំនួន៤រូប ក្រោមអធិបតីភាព លោក ស៊ុន យី អភិបាលនៃគណៈអភិបាលក្រុងប៉ៃលិន និងមានការចូលរួមពីលោកអធិការ អធិការងនគរបាលក្រុងប៉ៃលិន លោកចៅសង្កាត់ ព្រមទាំងតំណាងការិយាល័យជំនាញជុំវិញក្រុងជាច្រើននាក់ទៀត។
មន្រ្តីនគរបាលទាំង៤រូប ដែលត្រូវប្រកាសផ្ទេរ ទៅបំពេញភារកិច្ចថ្មី រួមមាន ទី១/ លោកអនុសេនីយ៍ឯក គង់ សំណាង អត្តលេខ១៩០៣០ ពីនាយប៉ុស្ត៍នគរបាលរដ្ឋបាលសង្កាត់អូរតាវ៉ៅ ទៅជាអធិការរងនៃអធិការដ្ឋាននគរបាលក្រុងប៉ៃលិន។ ទី២/លោកអនុសេនីយ៍ទោ ជា សុត្រា អត្តលេខ៥៥៦៥៥ ពីនាយរងផ្នែកនគរបាលយុត្តិធម៌ នៃអធិការនគរបាលក្រុងប៉ៃលិន ទៅជាមេប៉ុស្ត៍ស្តីទី នគរបាលរដ្ឋបាលសង្កាត់អូរតាវ៉ៅ។ ទី៣/លោកអនុសេនីយ៍ទោ សុខ រ៉ង អត្តលេខ៦៤៨៨០ ពីនាយរងប៉ុស្ត៍ ទៅជានាយប៉ុស្ត៍នស្តីទី គរបាលរដ្ឋបាលសង្កាត់ប៉ៃលិន។ ៤/លោកអនុសេនីយ៍ឯក ថី អៀន អត្តលេខ១៩០២៩ ពីនាយប៉ុស្ត៍នគរបាលរដ្ឋបាលសង្កាត់ប៉ៃលិន មកបំរើការងារផ្នែកសន្តិសុខ នៃអធិការដ្ឋាននគរបាលក្រុងប៉ៃលិន។
លោក ស៊ុន យី អភិបាលនៃគណអភិបាលក្រុងប៉ៃលិន បានមានប្រសាសន៍ថា ការផ្លាស់ប្តូរភារកិច្ចថ្មីរបស់មន្រ្តីនគរបាល គឺជារឿងធម្មតា ដើម្បីជំរុញការងារជំនាញអោយដំណើរការបានរលូនល្អ មានប្រសិទ្ធភាព។ ដូច្នេះមន្រ្តីនគរបាលដែលទើបទទួលបានការផ្ទេរភារកិច្ចថ្មីនេះ ត្រូវខិតខំយកចិត្តទុកដាក់បំពេញការងារដែលថ្នាក់លើប្រគល់ជូនអោយបានល្អ មានប្រសិទ្ធភាព, រក្សាបាននូវសន្តិសុខ សណ្តាប់ធ្នាប់ជូនប្រជាពលរដ្ឋ។ លោកបានណែនាំដល់មន្រ្តីនគរបាលទាំងអស់ ត្រូវខិតខំ គោរពនូវវិន័យ បទបញ្ជារបស់ថ្នាក់លើ និងត្រូវមានការអភិវឌ្ឍសមត្ថភាព បច្ចេកទេសរបស់ខ្លួនជាប្រចាំ ព្រមទាំងមានជំហរស្មារតីសាមគ្គីភាព ឯកភាពគ្នាអោយបានល្អ ទាំងក្នុងស្ថាប័ន និងក្រៅស្ថាប័ន ក្នុងការបំរើសេវាសាធារណៈជូនប្រជាពលរដ្ឋ ក៏ដូចជាការងារ បង្រ្កាប ទប់ស្កាត់នូវបទល្មើសនានានៅក្នុងមូលដ្ឋានអោយមានប្រសិទ្ធភាពខ្ពស់៕ ដោយ៖ វួចពឿន
