(26-11-2015) ប៉ៃលិន៖ រសៀលថ្ងៃទី២៦ ខែវិច្ឆិកា ឆ្នាំ២០១៥ នៅសាលាខេត្តប៉ៃលិន ឯកឧត្តម កើត សុធា អភិបាលនៃគណៈអភិបាលខេត្តប៉ៃលិន បានអនុញ្ញាតអោយប្រតិភូជនជាតិអ៊ីស្រាអែល ដឹកនាំដោយលោក Lichavnea ( លីក អៀវនៀ ) ជាវិស្វករទឹកស្អាតចូលជួបពិភាក្សាការងារលើគម្រោងវិនិយោគប្រព័ន្ធទប់ទឹកដើម្បីបំរើអោយវិស័យកសិកម្ម និងទឹកស្អាតនៅខេត្តប៉ៃលិន។
លោក លីក អៀវនៀ មានប្រសាសន៏ជម្រាបជូនឯកឧត្តម កើត សុធា ថា លោកបានមើលឃើញថាខេត្តប៉ៃលិនមានសក្តានុពលខាងវិស័យកសិកម្ម ហើយប្រជាជនភាគច្រើនប្រកបមុខរបរដាំដំណាំកសិកម្ម ដូចនេះលោកមានគោលបំណងវិនិយោគលើគម្រោងទប់ទឹកបន្ថែម ដើម្បីអោយប្រជាជនខេត្តប៉ៃលិន បានប្រើប្រាស់ស្រោចស្រប់ដំណាំកសិកម្មនិងដំណាំផ្សេងៗទៀតហើយមួយទៀតលោកក៏ចង់វិនិយោគលើវិស័យទឹកស្អាតផងដែរ។ គោលបំណងរបស់លោកគឺចង់វិនិយោគលើទីតាំងស្ទឹងអូរភ្នំដំបងដែលមានទឹកស្ទឹងធម្មជាតិហូរជាប់មិនដាច់។ក៏ប៉ុន្តែមុនឈានដល់ការអនុវត្តគម្រោងនេះ លោកចង់ដឹងព័ត៌មានលំអិតបន្ថែមតើផ្ទៃដីដាំដំណាំកសិកម្មនៅតំបន់នោះមានទំហំប៉ុន្មាន ដែលត្រូវការប្រើប្រាស់ទឹកសម្រាប់ស្រោចស្រប និងការប្រើប្រាស់ទឹកស្អាតប្រចាំថ្ងៃរបស់ប្រជាពលរដ្ឋមានទំហំប៉ុណ្ណាដើម្បីលោកងាយស្រួលរៀបចំឧបករណ៏បច្ចេកទេសអោយបានត្រឹមត្រូវ។លោកក៏បានបញ្ជាក់ជម្រាបជូនឯកឧត្តមអភិបាលខេត្តទៀតថា លោកបានធ្វើការនេះ បានជោគជ័យ នៅសយដាវប្រទេសថៃរួចមកហើយ។ ដូចនេះលោកមានឆន្ទះក្នុងការជួយខេត្តប៉ៃលិនដើម្បីអោយប្រជាពលរដ្ឋមានទឹកប្រកបមុខរបរដាំដំណាំកសិកម្ម ក៏ដូចជាមានទឹកស្អាតប្រើប្រាស់ប្រចាំថ្ងៃបានត្រឹមត្រូវ ជួយដល់សុខភាព និងជីវភាពរស់នៅរបស់ប្រជាពលរដ្ឋបានល្អប្រសើរ។
ឯកឧត្តម កើត សុធា អភិបាលនៃគណៈអភិបាលខេត្តប៉ៃលិន បានមានប្រសាសន៏ សម្តែងនៅការរីករាយនិងថ្លែងអំណរគុណចំពោះលោក លីក អៀវនៀ ដែលមានគម្រោងអភិវឌ្ឍន៏លើវិស័យស្រោចស្រប់ និងទឹកស្អាតនេះនៅតំបន់ជនបទខេត្តប៉ៃលិន។ ឯកឧត្តមជម្រាបជូនភ្ញៀវថា ខេត្តប៉ៃលិនមានផ្ទៃដីដាំដំណាំកសិកម្មយ៉ាងធំធេងណាស់ តែកន្លងមកបងប្អូនប្រកបមុខរបរដាំដំណាំកសិកម្ម បានជួបនៅគ្រោះរាំងស្ងួតហើយនៅកន្លែងខ្លះគ្មានប្រភពទឹកស្រោចស្រប ដោយថានៅប៉ៃលិនគឺជាតំបន់ខ្ពង់រាបងាយជួបបញ្ហាខ្វះខាតទឹក។ ដូចនេះបងប្អូនត្រូវការទឹកដើម្បីស្រោចស្របដំណាំកសិកម្ម ហើយបងប្អូននៅតំបន់នោះក៏ត្រូវការទឹកស្អាតប្រើប្រាស់ប្រចាំថ្ងៃផងដែរ។ក៏ប៉ុន្តែយ៉ាងណាក៏ដោយ យើងត្រូវការសិក្សាមើលលំអិតបន្ថែមពីទំហំផ្ទៃដីកសិកម្មនិងចំនួនប្រជាពលរដ្ឋត្រូវការប្រើប្រាស់ទឹកស្អាតនៅកន្លែងនោះ ព្រមទាំងលក្ខណៈបច្ចេកទេសនៃការទប់ទឹកស្ទឹងភ្នំអូរដំបងនេះអោយបានល្អិតល្អន់ជាមុនសិន។ ទាក់ទងនិងបញ្ហានេះឯកឧត្តមស្នើរអោយមន្ទីរជំនាញពាក់ព័ន្ឋទាំងអស់ សិក្សាអោយបានលំអិតគ្រប់ជ្រុងជ្រោយហើយយើងនិងពិភាក្សាគ្នាសម្រេចនៅពេលក្រោយបន្តទៀត។
[youtube id= “i3j394W1q90”]
