(07-01-2015) ប៉ៃលិន៖ នៅមន្ទីរគណបក្សប្រជាជនកម្ពុជាខេត្តប៉ៃលិននាព្រឹកថ្ងៃទី៧ ខែមករា ឆ្នាំ ២០១៥នេះបានរៀបចំប្រារព្ធខួបអនុស្សាវរីយ៍ លើកទី៣៦ នៃទិវាជ័យជំនះ ៧មករា (៧ មករា ១៩៧៩-០៧ មករា ២០១៥) ដែលជាថ្ងៃកំណើតទី២ របស់ប្រជាពលរដ្ឋកម្ពុជា ដែលពិធីនេះស្ថិតក្រោមអធិបតីភាព ឯកឧត្តម អ៊ី ឈាន សមាជិកគណកម្មាធិការកណ្តាល និងប្រធានក្រុមការងារចុះជួយខេត្តប៉ៃលិន ឯកឧត្តម កើត សុធា ប្រធានប្រធានគណបក្សប្រជាជនកម្ពុជាខេត្តប៉ៃលិន និង ឯកឧត្តម ឡី ចាន់ឆាយ អនុប្រធានគណបក្សខេត្ត ព្រមទាំងមានការអញ្ជើញ ចូលរួមពីសំណាក់ឯកឧត្តម លោកជំទាវ ជាអ្នកតំណាងរាស្ត្រខេត្ត សមាជិកព្រឹទ្ធសភានិងថ្នាក់ដឹកនាំខេត្ត មន្រ្តីរាជការជុំវិញខេត្ត កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋ ជាច្រើននាក់ ។
ឯកឧត្តម កើត សុធា បានអានសារលិខិតរបស់ សម្តេចអគ្គមហាធម្មពោធិសាល ជា ស៊ីម ប្រធានគណបក្សប្រជាជនកម្ពុជា ការរំលឹកខួបនូវ ថ្ងៃកំណើតទី២ នៃការរស់រានមានជីវិត របស់ប្រជា ពលរដ្ឋខ្មែរនេះ គឺដើម្បីរំលឹកដល់ ប្រជាពលរដ្ឋ ពិសេស ស្រទាប់យុវជន ឲ្យយល់ច្បាស់ចងចាំជានិច្ច និង ដឹងគុណជានិច្ចនៃថ្ងៃ៧ មករា១៩៧៩ និងស្នាដៃធំៗ ជាប្រវត្តិសាស្ត្រ ដែលគណបក្ស ប្រជាជនកម្ពុជា សម្រេចជូនជាតិ និងមាតុភូមិតាំងពី ដំណាក់កាលសង្គ្រោះជាតិ រហូតមកដល់បច្ចុប្បន្ន និងប្ដេជ្ញាការពារ មិនឲ្យមានរបបនេះវិលមកជាលើកទី២ឡើយ។រយះពេល៣៦ឆ្នាំនេះផ្តើមពីជ័យជំនេះ៧មករា ព្រះរាជាណាចក្រកម្ពុជាបានផ្លាស់ប្តូរយ៉ាងធំធេងដែលមិនអាចនឹកស្មានដល់ គឺពីទឹកដីមួយដែលនៅសេសសល់តែគំនរផេះផង់ស្លាកស្នាមនៃសង្គ្រាមនិងអំពើប្រល័យពូជសាសន៍ បានប្រែក្លាយទឹកដីកំពុងមានការអភិវឌ្ឍន៍មានការរីកចំរើនលើគ្រប់វិស័យ។
បន្ទាប់ពីតំណាងអង្គមិទ្ទិញបានធ្វើការប្តេជ្ញាចិត្តនិងនៅតែបន្តគាំទ្រទិវាថ្ងៃ៧មករាដែលជាកំណើតទី២របស់ប្រជាជនកម្ពុជារួចមក ឯកឧត្តម អ៊ី ឈាន បានមានប្រសាសន៍រំលឹកឡើងវិញពី សោកនាដកម្ម ក្នុងរបប៣ឆ្នាំ ៨ខែនិង២០ដែលប្រជាជនកម្ពុជា ទទួលរងនូវទុក្ខវេទនា រស់នៅក្នុងគុក ឥតជញ្ជាំង ដោយ ពួកប៉ុលពត បាន បង្ខិតបង្ខំប្រជាជន ឲ្យធ្វើការលើសកម្លាំងហូបចុក មិនគ្រប់គ្រាន់ និងបិទសិទ្ធសេរីភាព គ្រប់បែបយ៉ាង មិនត្រឹមតែប៉ុណ្ណោះ ពួកវាបានកាប់សម្លាប់ និងធ្វើទារុណកម្ម លើប្រជាជនឯងយ៉ាងសាហាវព្រៃផ្សៃបំផុត។ឯកឧត្តមបន្តទៀតថា «រហូតដល់ថ្ងៃរំដោះ៧មករា១៩៧៩របបដ៏យង់ឃ្នងនេះ ត្រូវបានផ្ដួលរំលំ ដោយសារ កម្លាំង មហាសាមគ្គី របស់រណសិរ្សសាមគ្គីសង្គ្រោះជាតិកម្ពុជា។ គុណបំណាច់ ដ៏ធំធេងនេះ ប្រជាជន កម្ពុជា ចងចាំជានិច្ច និងមិនអាចបំភ្លេចបានឡើយ»។
ឯកឧត្តម បានណែនាំដល់ថ្នាក់ដឹកនាំ មន្ដ្រីនិងបងប្អូនប្រជាពលរដ្ឋទាំងអស់ រំលឹកនូវការដឹងគុណផងដែរ ដល់វីរៈជន ស្នេហាជាតិ គ្រប់ទិសទី ដែលបានពលី ជីវិតរំដោះប្រជាជាតិ ឲ្យបានរួចផុតពីរបបដ៏យង់ខ្នងនេះ ហើយតទៅ យើងត្រូវខិតខំ បំពេញការងារ ទៅតាមតួនាទីរៀងៗខ្លួន ដើម្បីបម្រើ សំណូមពរ និង សេចក្ដីត្រូវ ការជូន ប្រជាពលរដ្ឋ រួមសាមគ្គីគ្នា ការពារសមិទ្ធផលទាំងឡាយ ឲ្យបានស្ថិតស្ថេរគង់វង្ស និង ស្មារតី៧ មករាឲ្យស្ថិតនៅជាអមត។ ឯកឧត្តម បានលើកឡើថា ជនទាំងឡាយណាដែល ដែលមិនទទួលស្គាល់ថ្ងៃ៧មករានោះ គឺជាអ្នកក្បត់ខ្លួនឯង ហើយ មិនទទួលស្គាល់ សច្ចះធម៌ប្រវត្តិសាស្រ្ត។
តមកថ្ងៃដដែលឯកឧត្តម អ៊ី ឈាន ឯកឧត្តម កើត សុធា ឯកឧត្តម ឡី ចាន់ ឆាយ លោកជំទាវ បានស្រីមុំ បានអញ្ជើញចុះសាកសួរសុខទុក្ខបងប្អូនប្រជាពលរដ្ឋកំពុងសំរាកព្យាបាលជម្ងឺនៅមន្ទីរពេទ្យបង្អែកខេត្តប៉ៃលិនព្រមទាំងបានចែកអំណោយដល់អ្នកជម្ងឺផងដែរ។
[youtube id= “32sk1FxWxJw”]
