(06-11-2016) ប៉ៃលិន៖ ថ្ងៃទី៦ ខែវិច្ឆិកា ឆ្នាំ២០១៦ ឯកឧត្តមកើត សុធា អភិបាល នៃគណៈអភិបាលខេត្តប៉ៃលិន និងលោកជំទាវ គង់ស្តី កើតសុធា ព្រមទាំងពុទ្ធបរិស័ទជិតឆ្ងាយបានអញ្ជើញដង្ហែរអង្គកឋិនទានទៅវេរប្រគេនដល់ព្រះសង្ឃគង់ចាំព្រះវស្សានៅមណ្ឌលវិប្បសនាធុរៈខេត្តប៉ៃលិនដែលស្ថិតនៅជើងភ្នំយ៉ាតភាគនារតី ក្នុងភូមិអូរតា ប្រាង ក្នុងសង្កាត់ប៉ៃលិន ក្រុងប៉ៃលិន ខេត្តប៉ៃលិន។
កឋិនទានគឺជាបុណ្យមួយមានតែក្នុងព្រះពុទ្ធសាសនាតែប៉ុណ្ណោះ , ជាកាលទានដ៏ពិសេស មានកំណត់ពេលវេលាច្បាស់លាស់ ពុំមែនចេះតែធ្វើនៅពេលណាក៏បានតាមចិត្តនោះឡើយ គឺអាចធ្វើបានតែក្នុងរយៈពេលតែ១ខែគត់ស្មើនឹង ២៩ថ្ងៃចាប់ពីថ្ងៃ ១រោចខែអស្សុជដល់ថ្ងៃ ១៥កើតខែកត្តិក។ វត្ថុដែលអាចយកមកធ្វើកឋិនបានមានតែស្បង់ ចីវរ និងក៏សង្ឃាដីតែប៉ុណ្ណោះ ហើយព្រះភិក្ខុសង្ឃ ក៏ក្រាលគ្រងបានតែ១មុខប៉ុណ្ណោះដែរ។ ក្នុងវត្តអារាមនីមួយៗ បើការចាំវស្សាគ្មានភិក្ខុសង្ឃសោះ ក៏មិនអាចហែកឋិនចូលដែរ ព្រោះសាមណេរគ្មានសិទ្ធិទទួលក្រាលគ្រងកឋិនទេ លុះត្រាតែយ៉ាងហោចណាស់ក៏ត្រូវមានភិក្ខុ ១អង្គដែរ ហើយដែលបានចាំព្រះវស្សាអស់៣ខែបានត្រឹមត្រូវ ទើបអាចហែកឋិនចូលបាន។ បុណ្យកឋិនទានរមែងទទួលបានអានិសង្ស ៥យ៉ាងគឺ៖ ទី១រមែងជាអ្នកមានបញ្ញាដ៏ច្រើន។ ទី២ រមែងបានជាអ្នកមានរូបល្អ ។ទី៣ រមែងជាអ្នកមានពណ៌សម្បុរកាយស្អាតល្អ ។ទី៤ រមែងជាអ្នកមានរូបរាងទ្រងទ្រាយស្អាតល្អ និងទី៥ រមែងបានកើតជាស្តេចចក្រពត្តិក្នុងជាតិណាមួយមិនខាន ។ ក្នុងឱកាសនៃការដង្ហែរអង្គកឋិនទានទៅកាន់មណ្ឌលវិប្បសនាធុរៈខេត្តប៉ៃលិននេះ ឯកឧត្តម កើត សុធា និងលោកជំទាវ ព្រមទាំងពុទ្ធបរិស័ទទាំងអស់ក៏បានប្រមូលថវិកាសរុបចំនួន១១លានរៀលសំរាប់តម្កល់កសាងសមិទ្ធផលនានាក្នុងមណ្ឌលផងដែរ៕
vv
[youtube id= “eqqt050vS3c”]
