(23-12-2016) ប៉ៃលិន៖ ព្រឹកថ្ងៃទី ២៣ ខែធ្នូ ឆ្នាំ២០១៦ ឯកឧត្តម នាយឧត្តមសេនីយ៍ មាស សុភា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានដឹកនាំគណៈប្រតិភូកងទ័ពជើងគោកដែលរួមមានវត្តមានឯកឧត្តម នាយឧត្តមសេនីយឯក ជា សារ៉ន មេបញ្ជាការរងនាយសេនាធិការកងទ័ពជើងគោក និង ឯកឧត្តម នាយឧត្តមសេនីយឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ និងមានការចូលរួមពី ឯកឧត្តម កើត សុធា គណអភិបាលខេត្តប៉ៃលិន ព្រមទាំងមេបញ្ជាការ មេបញ្ជាការរង នាយទាហានជាច្រើននាក់ទៀត ដែលស្ថិតនៅភូមិសាលាក្រៅ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
វរសេនីយ៍ត្រី ពេជ្រ វណ្ណសាង មេបញ្ជាការផ្នែកសឹករងសាលាក្រៅបានអាននូវកិច្ចស្វាគមន៍យ៉ាងកក់កក្តៅចំពោះគណៈប្រតិភូហើយនឹងសមិទ្ធផលដែលសម្រេចបាននាពេលកន្លងមកជាច្រើន ហើយជាពិសសអាគារទីបញ្ជាការ ០១ខ្នង អាគារស្នាក់នៅ ០២ខ្នង ផ្ទះបាយ ដំណាំហូបផ្លែផ្សេងៗ ហើយលើសពីនោះមានការចាត់តាំងការកសាងអង្គភាពរឹងមាំលើគ្រប់វិស័យ និងចាត់តាំងទស្សកិច្ចសិក្សាដកបទពិសោធន៍ និងឆ្លុះបញ្ចាំង ពីអង្គភាពមួយទៅអង្គភាពមួយក្រោមការត្រួតពិនិត្យ ពីមេបញ្ជាការមេបញ្ជាការរងកងទ័ពជើងគោក និងថ្នាក់ដឹកនាំយោធភូមិភាគ៥ ធ្វើឲ្យមានការរីកចំរើនប្រែប្រួលឈានឡើងជាលំដាប់ផងដែរ។
ឯកឧត្តម កើត សុធា គណអភិបាលខេត្តប៉ៃលិន បានសម្តែងនូវការកោតសសើរចំពោះផ្នែកសឹករងខេត្តដែលបានយកចិត្តទុកដាក់លើការការពារតាមតំបន់ព្រំដែល និងគោលដៅនៃទីបញ្ជាការនីមួយៗមានលក្ខណប្រសើរ។ឯកឧត្តមអោយកងឯកភាពនីមួយៗត្រូវចូលរួមជួយមូលដ្ឋានអោយបានច្រើនបន្ថែមទៀត ដើម្បីភាពកក់ក្តៅពីបងប្អូនប្រជាពលរដ្ឋ និងបង្ហាញពីការចូលរួមក្នុងសង្គមមួយដែលមិនអាចខ្វះបានឡើយ។ ម្យ៉ាងវិញទៀតត្រូវពង្រឹងសន្តិភាពតាមគោលនយោបាយឈ្នះៗរបស់រាជរដ្ឋាភិបាលអោយបានរឹងមាំបំផុតដើម្បីរួមចំណែកអភិវឌ្ឍន៍ទាំងថ្នាក់ក្រុងស្រុកខេត្ត និងប្រទេសជាតិទាំងមូល ។
ក្នុងឱកាសនោះដែរ ឯកឧត្តម នាយឧត្តមសេនីយ៍ មាស សុភា បានឲ្យដឹងថា ទស្សកិច្ចស្តីពីការកសាងពង្រឹងអង្គភាពនាពេលនេះ ដើម្បីពិភាក្សារកដំណោះស្រាយបញ្ហាដែលកើតឡើងក្នុងតំបន់ និងចាត់វិធានការរួមគ្នាពង្រឹងប្រតិបត្តបត្តិការសឹកក្នុងតំបន់ ការសួរសុខទុក្ខ ការចែករំលែកបទពិសោធន៍ ពិសេសការការពារព្រំដែនអធិបតីភាពដែនសមត្ថកិច្ចនីមួយអោយ ស្របតាមចក្ខុវិស័យរបស់រាជរដ្ឋាភិបាល។ នាយឧត្តមសេនីយ៍ មាស សុភា បានបញ្ជាក់បន្តទៀតថា អ្វីដែលជាប្រការសំខាន់បំផុត កងអនុសេនាធំ មានលក្ខន្ដិកៈ បទវិន័យទូទៅ មានឋានានុក្រមដឹកនាំបញ្ជា បានគោរព និងអនុវត្តន៍តាមបទបញ្ជារបស់រាជរដ្ឋាភិបាល ក្រសួងការពារជាតិ អគ្គបញ្ជាការ និងមេបញ្ជាការកងទ័ពជើងគោក ដើម្បីធ្វើឲ្យកងពលកាន់តែទទួលបានបទពិសោធន៍ ក្នុងភារកិច្ចការពារ បូរណភាពដែនដី ការពារសេចក្តីសុខព្រំដែន ការពាររដ្ឋធម្មនុញ្ញ ការពារព្រះមហាក្សត្រ និងការពាររាជរដ្ឋាភិបាល ស្របច្បាប់របស់កម្ពុជា៕
នាសៀលថ្ងៃដដែល នៅទីបញ្ជាការកងការពារព្រំដែនគោកលេខ៥០៤ ឯកឧត្តម នាយឧត្តមសេនីយ៍ មាស សុភា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ព្រមទាំងប្រតិភូអមដំណើរបានអញ្ជើញកាត់ខ្សែបូបញ្ចុះនូវបឋមសិលាគ្រឹះកសាងនូវអាគារសាលប្រជុំ ១ខ្នង ដែលជាអំណោយដ៏ថ្លៃថ្លារបស់ឯកឧត្តម ឧត្តមសេនីយឯក ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិលដែលជាសម្ព័ន្ធមេត្រីភាព។
នាយឧត្តមសេនីយ៍ មាស សុភា អគ្គមេបញ្ជាការរង នៃកងយោធពលខេមរភូមិន្ទបានមានប្រសាសន៍កោតសសើរដល់កងការពារលេខ៥០៤ យោធភូមិភាគ៥ ដែលសម្រេចបាននូវសមិទ្ធផល លទ្ធផលវិជ្ជមានជាច្រើនគួរឲ្យកត់សម្គាល់ខ្ពស់។ សង្កេតឃើញថាសភាពការណ៍នៅតាមជួរបន្ទាត់ព្រំដែន (ខ្មែរ-ថៃ) នាដែនខេត្តប៉ៃលិនសភាពស្ងប់ស្ងាត់ល្អ ហើយអង្គភាពមានភារកិច្ចទទួលខុសត្រូវការងាររៀងៗដោយមុះមុតក្លាហាន រឹងមាំ និងសាមគ្គីល្អ។ នាយឧត្តមសេនីយ៍ មាស សុភា បានបញ្ជាក់បន្ថែមអោយនាយទាហាន ទាហានរង ត្រូវឈរលើគោលជំហររបស់ រាជរដ្ឋាភិបាលការពារបូរណភាពទឹកដី ប្រជាជនដោយឆន្ទះមុះមុតជានិច្ច៕
vv
[youtube id= “u8W5l4_2lS0”]
