(05-11-2015) ប៉ៃលិន៖ ថ្ងៃទី០៥ ខែវិច្ឆិកា ឆ្នាំ២០១៥ ក្រុមប្រឹក្សាខេត្តប៉ៃលិនបានរៀបចំកិច្ចប្រជុំសាម័ញ្ញលើកទី១៨ អាណត្តទី២ ក្រោមអធិបតីភាព ឯកឧត្តម ឡី ចាន់ឆាយ ប្រធានក្រុមប្រឹក្សាខេត្ត និងឯកឧត្តម កើត សុធា អភិបាល នៃគណអភិបាលខេត្ត និងដោយមានការអញ្ជើញចូលរួមពីសំណាក់ឯកឧត្តម លោកជំទាវ អភិបាលរងខេត្ត លោកប្រធាន អនុប្រធានមន្ទីរ មន្រ្តីរាជការ និងតំណាងអង្គការនានាមួយចំនួនទៀត។
កិច្ចប្រជុំមានរបៀបវរៈទី១ពិនិត្យ និងអនុម័ត្តរបៀបវរៈនៃកិច្ចប្រជុំសាម័ញ្ញលើកទី១៨។ទី២ ពិនិត្យ និងអនុម័ត្តកំណត់ហេតុកិច្ចប្រជុំសាម័ញ្ញលើកទី១៧ របស់ក្រុមប្រឹក្សាខេត្ត។ ទី៣ ពិនិត្យ និងអនុម័ត្តលើរបាយការណ៍រដ្ឋបាលខេត្ត ប្រចាំខែ តុលា ឆ្នាំ២០១៥ និង ទី៤ បញ្ហាផ្សេងៗ។
បន្តាប់ពីលោក ចាវ ខាន់ នាយករងរដ្ឋបាលសាលាខេត្តប៉ៃលិនបានអានរបាយការណ៍ប្រចាំខែតុលា ជូនអង្គប្រជុំជ្រាបរួចមកអង្គប្រជុំក្រុមប្រឹក្សាខេត្តក៏បានលើកយកបញ្ហាផ្សេងៗ មួយចំនួនមកពិភាក្សា និងដោះស្រាយ ដូចជា ៖ ការបញ្ជាក់លិខិតមរណ:ភាព បញ្ហាដីភ្នំនៅក្នុងសង្កាត់អូរវ៉ៅ ដីនៅជើងភ្នំយ៉ាត បញ្ហាការអភិវឌ្ឍន៏នៅតាមឃុំ/សង្កាត់នីមួយៗ បញ្ហាការធ្វើរបាយការណ៏បញ្ហាការបង់ចំណូល និងចំណាយ ថវិការដ្ឋជាដើម។ បន្ទាប់ពី អង្គភាពជំនាញពាក់ព័ន្ធ បានឆ្លើយបំភ្លឺចំពោះបញ្ហា ការលើកឡើងរបស់ក្រុមប្រឹក្សាខេត្តរួចមក ឯកឧត្តម កើត សុធា អភិបាលនៃគណអភិបាលខេត្តប៉ៃលិនបានមានប្រសាសន៍ ឯកភាពលើការលើកឡើងរបស់មន្រ្តីជំនាញ ហើយឯកឧត្តមបានស្នើឲ្យអង្គភាពមន្ទីរជំនាញជុំវិញ ខេត្តទាំងអស់ត្រូវបំពេញការងារតាមថានានុក្រមនិងត្រូវពិនិត្យមើលឲ្យបានម៉ត់ចត់ការគ្រប់គ្រងការចាយថវិ ការ រដ្ឋ ការបើកផ្ដល់ប្រាក់បៀវត្តជូនមន្រ្តីរាជការឲ្យបានទៀងទាត់ ការជុំរុញការធ្វើផែនការវិនិយោគ និងត្រូវពង្រឹងកិច្ចការការពារសន្តិសុខសណ្ដាប់ធ្នាប់សង្គមឲ្យល្អថែមទៀត។
មានប្រសាសន៍បិទអង្គប្រជុំ ឯកឧត្តម ឡីចាន់ឆាយ ប្រធានក្រុមប្រឹក្សាខេត្តបានថ្លែងអំណគុណ និងកោតសរសើរដល់គណអភិបាលខេត្តដែលបានខិតខំបំពេញការងារតួនាទីរបស់ ខ្លួនបានល្អប្រសើ ទោះបីថា នៅមានការខ្វះចន្លោះលើចំនុចខ្លះៗក៏ពិតមែន ប៉ុន្តែបញ្ហាទាំងអស់យើងត្រូវតែបន្តរួមគ្នាដោះស្រាយតទៅទៀត ។ ឯកឧត្តមក៏បានស្នើអោយគណអភិបាល និងមន្ទីរស្ថាប័នជុំវិញខេត្តត្រូវយកចិត្តទុកដាក់ខ្ពស់លើកបញ្ហា សន្តិសុខ សណ្តាប់ធ្នាប់ សង្គម និងការអនុវត្តគោលនយោបាយភូមិឃុំមានសុវត្ថភាពអោយទទួលបានលទ្ធផលខ្ពស់ ។ ម្យ៉ាងទៀត ត្រូវពិនិត្យ ណែនាំអោយមន្រ្តីរាជការ កងកំលាំងប្រដាប់អាវុធ នៅតាមមន្ទីរអង្គភាពមួយចំនួន អោយមានជំហរសាមគ្គីភាព ឯកភាពគ្នាអោយបានល្អទាំងនៅក្នុងអង្គភាពរបស់ខ្លួន ក៏ ដូចជាជាមួយអង្គភាពដទៃ និងជាមួយមហាជនទូទៅផងដែរ។
[youtube id= “9TrbQZ74dAY”]
