(09-11-2015) ប៉ៃលិន៖ នៅសាលប្រជុំសាលាខេត្តប៉ៃលិន នារសៀលថ្ងៃទី០៩ ខែវិច្ឆិកាឆ្នាំ២០១៥ ឯកឧត្តម កើត សុធា អភិបាលខេត្តប៉ៃលិន បានទទួលជួបឯកឧត្តម ឯកឧត្តម ស៊ុមស័កិ្ក បរិសុទ្ធោ ហេមថាណុ អភិបាលខេត្តចាន់បុរី នៃព្រះរាជាណាចក្រថៃឡង់ ដើម្បីពិភាក្សាការងារ និងពង្រឹងការទំនាក់ទំនងកិច្ចសហប្រតិបត្តិការទៅវិញទៅមរវាងខេត្តនៃប្រទេសទាំង ដែលមានភូមិផងរបងជាមួយគ្នា និងការរឹតចំណងមេត្រីភាពឲ្យកាន់ប្រសើរឡើង ជាពិសេសការដោះដូរពាណិជ្ជកម្ម លើកកំពស់កំរិតជីវភាពរបស់ប្រជាជនខេត្តប៉ៃលិន និងខេត្តចាន់បុរី ។
ក្នុងជំនួបពិភាក្សារយះពេល២ម៉ោង ឯកឧត្តម កើត សុធា អភិបាលខេត្តប៉ៃលិន បានវាយតម្លៃខ្ពស់ អំការទំនាក់ទំនង និងកិច្ចសហប្រតិបត្តិការល្អប្រសើរ ដែលភាគីទាំង២បានអនុវត្តកន្លងមកនៅតាមជួរបន្ទាត់ព្រំដែន ។ឯកឧត្តមបានជំរុញឲ្យសមត្ថកិច្ចទាំងអស់បន្តពង្រឹងកិច្ចសហប្រតិបត្តិការគ្នាជាមួយភាគីថៃឲ្យកាន់តែល្អប្រសើរថែមទៀត ដើម្បីឲ្យដំណើរនាំចេញ នាំចូល និងការដោះដូរពាណិជ្ជកម្ម ធានាបាននូវផលប្រយោជន៏សម្រាប់ប្រជាពលរដ្ឋនៃខេត្តទាំងពីរ។ឯកឧត្តមកើតសុធា ក្នុងនាមមន្រ្តីដែលប្រចាំការនៅតាមមាត់ច្រកទ្វាព្រំដែន បានបន្តប្តេជ្ញារួមគ្នាក្នុងការធ្វើឲ្យព្រំដែននៃប្រទេសទាំងពីរក្លាយជាព្រំដែនដោះដូរពាណិជ្ជកម្មកាន់តែច្រើនឡើង និងរក្សាបានព្រំដែនសន្តិភាព មិត្តភាព អភិវឌ្ឍន៏ និងកិច្ចសហប្រតិបត្តិការ។ ក្នុងឱកាសនោះឯកឧត្តម កើត សុធា អភិបាលខេត្តប៉ៃលិន បានលើកឡើងដែរនូវបញ្ហាមួយចំនួនដែលនៅសេសសល់ ដែលភាគីទាំងពីរត្រូវរួមគ្នាដោះស្រាយនោះរួមមាន៖
ទី១ បញ្ហាការស្ថាបនាស្ពានថ្មីឆ្លងព្រំដែន នៅច្រកទ្វារព្រំដែនអន្តរជាតិព្រំ ដើម្បីជួយសម្រួលដល់ការធ្វើចរាចរចេញចូល របស់ប្រជាពលរដ្ឋនៃប្រទេសទាំងពីរ ។ បញ្ហាទី២ការរៀបចំបើកច្រករបៀងថ្មីមួយគឺច្រកអូរឡាំចិត ដើម្បីចរាចរទំនិញ និងផលិតផលកសិកម្មក្នុងកំរិតរវាងខេត្តនិងខេត្ត ។ ទី៣ បញ្ហាពលករកម្ពុជា ដែលកំពុងស្នាក់នៅប្រកបការងារពលកម្មនៅក្នុងខេត្តចាន់បុរី ឯកឧត្តមអភិបាលខេត្តបានស្នើឲ្យភាគីថៃជួយសម្រួលធ្វើយ៉ាងណាការប្រកបការងាររបស់បងប្អូនពលករមានសុត្ថិភាពទាំងផ្លូវកាយ និងប្រាក់កមរ៉ៃពលកម្ម ដោយពុំមានការបង្ខិតបង្ខំ និងបញ្ហាទី៤ ការនាំចេញផលិតផលកសិកម្ម រួមមានដំឡូងមី ពោត ស្វាយ ក្រូចឆ្មា និងផលិតផលកសកម្មមួយចំនួនទៀត ។
ជាការឆ្លើយតបឯកឧត្តម ឯកឧត្តម ស៊ុមស័កិ្ក បរិសុទ្ធោ ហេមថាណុ អភិបាលខេត្តចាន់បុរី ព្រះរាជាណាចក្រថៃបានសម្តែងនូវសេចក្តីរីករាយចំពោះការទទួលស្វាគមន៏ប្រកបដោយភាពរាក់ទាក់ ក្នុងបរិយាកាសដែលព្រះរាជាណាចក្រកម្ពុជា ពិសេសខេត្តប៉ៃលិនបានប្រារព្វទិវាបុណ្យឯករាជ្យជាតិ៩វិច្ឆិកា និងថ្ងៃកំណើតកងយោធពលខេមរភូមិន្ទយ៉ាងឱឡារិក ។ ឯកឧត្តមបញ្ចាក់ថា រួបឯកឧត្តមផ្ទាល់ទើបទទួលបានការតែងតាំងជាអភិបាលខេត្តចាន់ថបុរីនាពេលថ្មីៗ ដូចេ្នះឯកឧត្តមនិងបន្តនូវអ្វីដែលភាគីទាំងពីរកំពុងអនុវត្ត និងបន្តខិតខំដោះស្រាយចំពោះបញ្ហា ដែលមានលើកឡើងថ្មីៗទៀត ដែលជាចំណុចសំខាន់របស់អាជ្ញាធរខេត្តទាំងពីរក៏ដូចជាប្រមុខរដ្ឋាភិបាលប្រទេសទាំងពីរបន្តប្តេជ្ញា និងសហការរួមគ្នា។បញ្ហានៃការស្ថាបនាស្ពានឆ្លងព្រំដែន នៅចំណុចច្រកទ្វាអន្តរជាតិព្រំភាគីថៃបានឯកភាពជាគោលការណ៌ក្នុងគម្រោងស្ថាបនា ហើយបានធ្វើការសិក្សាវាយតម្លៃរួចរាល់អស់ហើយ និងរងចាំតែគ្រោងថវិកាដែលត្រូវចំណាយក្នុងការស្ថាបនាប៉ុណ្ណោះ ។ បញ្ហាទី២ ការរៀបចំបើកច្រករបៀងថ្មីមួយគឺច្រកអូរឡាំចិត ដើម្បីចរាចរទំនិញ ឬផលិតផលកសកម្ម ភាគីថៃសុំពេលស្នើសុំទៅរដ្ឋាភិបាលដើម្បីសម្រេច ។ ទី៣បញ្ហាពលករដែលកំពុងស្នាក់នៅប្រកបការងារក្នុងខេត្តចាន់បុរី ឯកឧត្តម អភិបាលខេត្តបានបញ្ចាក់ថា ឯកឧត្តមក៏ដូចជាមន្រ្តីគ្រប់ផ្នែក នឹងយកចិត្តទុកដាក់ឲ្យបានល្អប្រសើបំផុត ហើយចាត់ទុកបងប្អូនពលករកម្ពុជាជាបងប្អូនតែមួយ និងមានសិទ្ធិសេរីភាពពេញលេញក្នុងការប្រកបការងារ ។ បញ្ហាទី៤ ចំពោះការនាំចេញផលិតផលកសិកម្មរបស់ប្រជាពលរដ្ឋខេត្តប៉ៃលិនរួមមានដំឡូងមី ពោត ស្វាយនិងដំណាំកសិកម្មមួយចំនួនទៀត ភាគីថៃបានបន្តរក្សាពង្រឹងកិច្ចហការឲ្យកាន់តែល្អប្រសើរឡើងថែមទៀត។ ក្នុងជំនួបនោះភាគីទាំងពីរក៏បានលើកឡើងនូវការទំនាក់ទំនងវិស័យអប់រំរវាងវិទ្យាល័យក្រុងទេពនិម្មិតហ៊ុនសែន និងវិទ្យាល័យខេត្តចាន់ថបុរី ក្នុងនោះរួមមានការផ្លាស់ប្តូរបទពិសោធន៏រវាងលោកគ្រូ អ្នកគ្រូ និងរវាងសិស្សនុសិស្ស ដែលនេះជាផ្នែកមួយនៃ ការចុះអនុសារណៈនៃការយោគយល់រយះពេលកន្លងមក ។ ការសហការផ្តល់ព័ត៌មានទៅវិញទៅមកឲ្យបានឆាប់រហ័ស ក្នុងការទប់ស្កាត់ និងបង្រ្កាប បទល្មើសឆ្លងដែនខុសច្បាប់។ បន្ទាប់ពី ជំនួបពិភាក្សាឯកឧត្តម កើត សុធា អភិបាលខេត្តប៉ៃលិន និងឯកឧត្តម ស៊ុម សាក់អេមថានុន អភិបាលខេត្តចាន់បុរី បានផ្តល់បទសំភាសន៏បន្ថែមអំពីលទ្ធផលដែលសម្រេចបានក្នុងកិច្ចជំនួបនោះដែលមានខ្លឹមសារដូចតទៅៈ(ឃ្លីប)។
[youtube id= “KWp3RNlsMF0”]
