ឯកឧត្តម កើត សុធា ដង្ហែរអង្គកឋិនទានសាមគ្គីទៅ វេប្រគេនដល់ព្រះសង្ឃគង់ចាំព្រះវស្សានៅ វត្តភ្នំក្រិញ


​(12-11-2015) ប៉ៃលិន៖ ថ្ងៃ​ទី១២ ​ខែវិច្ឆិកា​ ឆ្នាំ​២០១៥ ​ឯក​ឧត្តម ​កើត​ សុធា​ អភិបាល​នៃ​គណ​អភិ​បាល​ខេត្ត​ប៉ៃលិន ​លោក​ជំទាវ​គង់​ស្តី ​កើត​សុធា ​លោក​ជំទាវ​ ជា​លាភ​អភិបាល​រង​ខេត្ត​ប៉ៃលិន​ លោក​ជំទាវ​ស៊ុម​ ហៀង​ ប្រធាន សភា​ពាណិជ្ជ​កម្ម​ខេត្ត​ប៉ៃលិន​ ព្រម​ទាំង​មន្រ្តី​រាជ​ការ​ ពុទ្ធ​បរិ​ស័ទ​ ជា​ច្រើន​ទៀត​បាន​ដង្ហែរ​អង្គ​កឋិន​ទាន​ សាមគ្គី​ទៅ​វេ​ប្រគេន​ដល់​ព្រះ​សង្ឃ​គង់​ចាំ​ព្រះ​វស្សា​អស់​ត្រី​មាស​នៅ​វត្ត​ភ្នំ​ក្រិញ ​ស្ថិត​ក្នុង​ភូមិ​ភ្នំ​ក្រិញ ​ឃុំ​ស្ទឹង​ត្រង់ ​ស្រុក​សាលា​ក្រៅ ​ ខេត្ត​ប៉ៃលិន​។​

​ អង្គ​កឋិន​ទាន​សាមគ្គី​នេះ ​បាន​ធ្វើ​ពីធី​សែន​ក្រុង​ពាលី ​សូត្រ​មន្ត ​សំដែង​ព្រះ​បរិត​ ពុទ្ធ​ជ័យ ​និង​សំដែង​ធម៌​ទេសនា​ នៅ​គេហ​ដ្ឋាន​ឯក​ឧត្តម​ កើត ​សុធា ​នា​ល្ងាច​ថ្ងៃ​ទី១១ ​ខែ​វិច្ឆិកា​ ឆ្នាំ​២០១៥​ លុះ​ព្រឹក​ឡើង​ថ្ងៃ​ទី ​១២​ ខែ​វិច្ឆិកា ​ឆ្នាំ​២០១៥ ​បាន​រៀប​ចំ​ក្បួន​ដង្ហែរ​អង្គ​កឋិន​សាមគ្គី​ ចេញ​ពី​គេហ​ដ្ឋាន​ឯក​ឧត្តម ​កើត ​សុធា ​អភិបាល​នៃ​គណ​អភិបាល​ខេត្ត​ប៉ៃលិន លោក​ជំទាវ​គង់​ស្តី ​កើត​សុធា ​ឆ្ពោះ​ទៅ​កាន់​វត្ត​ភ្នំ​ក្រិញ​ ដើម្បី​វេ​ប្រគេន​ដល់​ព្រះ​សង្ឃ​គង់​ចាំ​ព្រះ​វស្សា​អស់​ត្រី​មាស​នៅ​ទី​អារាម​នោះ​តែ​ម្តង​។​

​កឋិន​ទាន ​គឺ​ជា​បុណ្យ​មួយ ​ក្នុង​ប្រពៃណី​ព្រះ​ពុទ្ធ​សាសនា​  ដែល​ជា​កាល​ទាន​ដ៏​ពិសេស​មួយ​មាន​កំណត់​ពេល​វេលា​ច្បាស់​លាស់​ ពុំ​មែន​ចេះ​តែ​ធ្វើ​នៅ​ពេល​ណា ​ក៏​បាន​តាម​ចិត្ត​ចង់​នោះ​ឡើយ​។ ​កឋិន​ទាន​ អាច​ធ្វើ​បាន​តែ​ក្នុង​រយៈ​ពេល​ ២៩​ថ្ងៃ​ប៉ុណ្ណោះ ​ដោយ​ចាប់​ពី​ថ្ងៃ​ ១​រោច​ ខែ​អស្សុជ ​ដល់​ថ្ងៃ​១៥​កើត ​ខែ​កត្តិក ​។ ​​ក្នុង​វត្ត​មួយ ​បើ​ការ​ចាំ​វស្សា ​ គ្មាន​ភិក្ខុ​នោះ​ទេ ​ក៏​មិន​អាច​ហែរ​កឋិន​ចូល​បាន​ដែរ​ ព្រោះ​សាមណេរ​ គ្មាន​សិទ្ធិ​ទទួល​ក្រាល​គ្រង​កឋិន​ទេ ​លុះ​ត្រា​តែ​យ៉ាង​ហោច​ណាស់​ក៏​ត្រូវ​មាន​ភិក្ខុ ​១​អង្គ​ដែរ ​ហើយ​ដែល​បាន​គង់​ចាំ​វស្សា ​អស់​៣​ខែ ​បាន​ត្រឹម​ត្រូវ​ ទើប​អាច​ហែ​កឋិន​ចូល​បាន​។​  ការ​ធ្វើ​កឋិន ​គឺ​សំដៅ​យក​តែ​ស្បង់ ​និង​ចីវរ​តែ​ប៉ុណ្ណោះ ​ ប៉ុន្តែ​ការ​ដែល​ពុទ្ធ​បរិស័ទ ​មាន​សទ្ធា​ជ្រះ​ថ្លា ​នាំ​សម្ភារៈ​ ថវិកា ​ត្រៃ ​ចីវរ​ ​លើស​ពី​នេះ​ទៅ​ទៀត​ ក៏​រឹត​តែ​ប្រសើរ​ គឺ​បាន​ផល្លា​និសង្ស​ដល់​អ្នក​ធ្វើ​កឋិន ​កាន់​តែ​ច្រើន ​តាម​សម្ភារៈ​បរិក្ខារ​ ដែល​ជា​បរិវារ​កឋិន​នោះ​។​

​ក្នុង​ឱកាស​នៃ​ការ​ដង្ហែរ​អង្គ​កឋិន​ទាន​ទៅ​វេ​ប្រគេន​ដល់​ព្រះ​សង្ឃ​គង់​ចាំ​ព្រះ​វស្សា​អស់​ត្រី​មាស​នៅ​វត្ត​ភ្នំ​ក្រិញ ​ឯក​ឧត្តម ​កើត ​សុធា ​អភិបាល​នៃ​គណ​អភិបាល​ខេត្ត​ប៉ៃលិន ​លោក​ជំទាវ​គង់​ស្តី ​កើត​សុធា ​លោក​ជំទាវ​ ជា​លាភ​អភិ​បាល​រង​ខេត្ត​ប៉ៃលិន​ លោក​ជំទាវ​ស៊ុម​ ហៀង​ ប្រធាន​សភា​ពាណិជ្ជ​កម្ម​ខេត្ត​ប៉ៃលិន ​ព្រម​ទាំង​មន្រ្តី​រាជ​ការ​ពុទ្ធ​បរិ​ស័ទ ​បាន​ប្រមូល​បច្ច័យ​សំរាប់​តំកល់​កសាង​សមិទ្ធ​ផល​នានា​ក្នុង​វត្ត​ភ្នំ​ក្រិញ​ចំនួន​ ៣០​លាន​ ៩៨​ម៉ឺន​រៀល​។​

cpp-12-11-2015-001 cpp-12-11-2015-002 cpp-12-11-2015-003 cpp-12-11-2015-004

[youtube id= “3Z-dwGZ9j6E”]