(30-04-2016) ប៉ៃលិន៖ នៅថ្ងៃទី៣០ ខែមេសាឆ្នាំ២០១៦នេះឯកឧត្តមធូ ភា អភិបាលរងខេត្តប៉ៃលិន តំណាងឯកឧត្តម កើត សុធា អភិបាលខេត្តនិងលោកវីរ:សេនីយ៏ឯក តូ គឹម ឃុនមេបញ្ជាការរង កងតំបន់ប្រតិបត្តការសឹករងខេត្ត បានបន្តដឹកនាំកងកម្លាំងប្រដាប់អាវុធ និងមន្រ្តីរាជការ ដឹកជញ្ជូនទឹកស្អាតដោយរថយន្ត ចំនួន ៥គ្រឿង ស្មើ ២០.០០០ លីត្រ ទៅចែកជូនប្រជាពលរដ្ឋនៅ ចំនួន ៣ភូមិ គឺភូមិដីសរមានប្រជាជន ២០០គ្រួសារភូមិបាយសី ៧៥ គ្រួសារ និងភូមិព្រៃសន្ទះ ១៤៥គ្រួសារ ស្ថិតឃុំស្ទឹងត្រង់ ស្រុកសាលាក្រៅ ដែលកំពុងជួបប្រទះបញ្ហា ខ្វះខាតទឹកប្រើប្រាស់ដោយសារគ្រោះរាំងស្ងួត។
លោក ធូ ភា អភិបាលរងខេត្ត ប៉ៃលិន មានប្រសាសន៏ ទៅកាន់បងប្អូនប្រជាជនរដ្ឋទាំងអស់ថាគ្រោះ រាំងស្ងួតនេះ បានកើតឡើងនៅគ្រប់ខេត្តទូទាំងប្រទេស ហើយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បាន ណែនាំឲ្យអាជ្ញាធរមូលដ្ឋាន កងកម្លាំងប្រដាប់អាវុធមន្រ្តីរាជការគ្រប់ជាន់ថ្នាក់ទាំងអស់ ត្រូវរួមគ្នា ចុះជួយដោះស្រាយ នាំយកទឹកចែកជូនប្រជាពលរដ្ឋនៅតាមមូលដ្ឋានឲ្យទាន់ពេលវេលា ដើម្បីបងប្អូនប្រជាពលរដ្ឋយើងមានទឹកប្រើប្រាស់បានគ្រប់ៗគ្នាដោយមិនទុកឲ្យប្រជាពលរដ្ឋយើងណាម្នាក់ខ្វះខាតទឹកប្រើប្រាស់នោះឡើយ។ ហើយនៅពេលនេះ អាជ្ញាធរខេត្ត កងកម្លាំងប្រដាប់អាវុធ រួមនិងមន្រ្តីរាជការគ្រប់ជាន់ថ្នាក់បាននាំយកទឹកសម្រាប់ប្រើប្រាស់ មកចែកទឹកជូនបងប្អូនដោយយើងបានប្រើប្រាស់រថយន្ត របស់កងពលតូចដឹកជញ្ជូនលេខ៩៩នៃក្រសួងការពារជាតិដឹកទឹកស្អាតយកមកចែកជូនដល់បងប្អូនដល់លំនៅស្ថានតែម្ដង។ ហើយការចែកជូនទឹកនេះគឺមិនមែនធ្វើតែប៉ុន្មានភូមិនេះ ចប់នោះទេ គឺនៅតែបន្តចែកជូនដល់បងប្អូនគ្រប់ភូមិដែលខ្វះទឹករហូតដល់ពេលណាមានភ្លៀងធ្លាក់មានទឹកដក់តាមស្រះតាមអណ្ដូងឡើងវិញ។ លោកបានបន្តថា ទន្ទឹមនឹងបងប្អូន បានទឹកប្រើប្រាស់ហើយ សូមបងប្អូនត្រូវយកចិត្តទុកដាក់ គិតគូរថែទាំសុខភាពឲ្យបានល្អផងដែរ ត្រូវទទួលទាន ទឹកស្អាត ទឹកដាំពុះ និងទទួលទានចំណីអាហារដែលមានអនាម័យដើម្បីជៀសវាង កើត ជាជម្ងឺរាគរួស ធ្វើឲ្យប៉ះពាល់សុខភាព ក្រុមគ្រួសារយើង។
vv
[youtube id= “Yqa3b7JytDU”]
