(18-07-2016) ប៉ៃលិន៖ ថ្ងៃទី១៨ ខែកក្កដា ឆ្នាំ២០១៦ ឯកឧត្តម អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់ជាតិ ចុះជួយខេត្តប៉ៃលិន និងឯកឧត្តម កើត សុធា អភិបាល នៃគណអភិបាលខេត្តប៉ៃលិន បាននាំយកទៀនព្រះវស្សា និងទេយ្យទាន បច្ច័យ វេរប្រគេនព្រះសង្ឃ ដែលគង់ចាំព្រះវស្សា ចំនួន៣២វត្ត ក្នុងខេត្តប៉ៃលិន។ ពិធីប្រគេនទៀនព្រះវស្សានេះបានធ្វើឡើង នៅវត្តព្រះពុទ្ធត្រៃរតន៍មង្គល ហៅវត្តអូរប្រើស ស្ថិតក្នុងសង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដោយមានការអញ្ជើញចូលរួមពី អ្នកឧកញ្ញា មន្រ្តីរាជការ ពុទ្ធបរិស័ទ ជាច្រើននាក់ទៀតផងដែរ ។
តាមទំនៀមទំលាប់ប្រពៃណីព្រះពុទ្ធសាសនា ព្រះសង្ឃទាំងឡាយគ្រប់អារាមក្នុងព្រះរាជាណាចក្រ កម្ពុជាត្រូវនិមន្តចូលកាន់ព្រះវស្សាអស់ថេរវេលា ៣ខែ ចាប់តាំងពីថ្ងៃ ១រោចខែអាសាធតទៅ ។ ក្នុងរយៈវេលា៣ខែនេះនៅគ្រប់ព្រះវហារនៃទីវត្តទាំងឡាយ គេតែងរក្សាភ្លើងទៀនព្រះវស្សាឲ្យនៅឆេះជានិច្ច ។ ទៀនវស្សា និងបរិក្ខាផ្សេងៗមានសារៈសំខាន់ណាស់ សំរាប់ព្រះសង្ឃគង់នៅវត្តអារាមនីមួយៗ នៅទូទាំងប្រទេស នារដូវកាលនៃពិធីបុណ្យចូលព្រះវស្សានេះ ព្រោះថា នៅរដូវកាលនៃការចូលព្រះវស្សា មានភ្លៀងធ្លាក់ច្រើន បង្ករការលំបាកចំពោះព្រះភិក្ខុសង្ឃ និងសាមណេរក្នុងការនិមន្តចេញទៅបិណ្ឌបាត្រ នៅតាមតំបន់ផ្សេងៗ នាភូមិដ្ឋានប្រជាពលរដ្ឋ ហើយនាពេលនេះទៀត ពុទ្ធបរិស័ទជើងវត្តក៏មានភាពមមាញឹកនឹងការធ្វើស្រែចំការ នារដូវវស្សា សំរាប់ផ្គត់ផ្គង់ជីវភាពគ្រួសារ។
ក្នុងឱកាសនោះ ឯកឧត្តម អ៊ី ឈាន បានមានប្រសាសន៍ថា ក្រោមការដឹកនាំដ៏ត្រឹមត្រូវរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បាននាំមកនូវសុខសន្តិភាព ស្ថិរភាពនយោបាយ និងការអភិវឌ្ឍន៍លើគ្រប់វិស័យ ទាំងខាងពុទ្ធចក្រ និងអាណាចក្រ , ប្រជាពលរដ្ឋកម្ពុជា បានរស់នៅបានសុខស្រួល សប្បូរសប្បាយ មានសិទ្ធិសេរីភាព ។
ឯកឧត្តម បានបន្តថា បើយើងក្រលេកមើលពីអតិតកាល ចាប់តំាងពីក្រោយថ្ងៃរំដោះ ៧ មករា ឆ្នាំ១៩៧៩ និងក្រោយសមាហរណកម្ម ១៥ មិថុនា ឆ្នាំ១៩៩៦ មកទល់ពេលបច្ចុប្បន្ននេះ រាជរដ្ឋាភិបាលកម្ពុជា ក្រោមការដឹកនាំដ៏ត្រឹមត្រូវរបស់ សម្តេចតេជោ ហ៊ុន សែន បានយកចិត្តទុកដាក់យ៉ាងខ្លាំងក្នុងការកសាង ស្តារ និងអភិវឌ្ឍន៍ឡើងវិញវត្តអារាមទាំងអស់នៅទូទំាងប្រទេស ត្បិតអីនៅក្នុងរបប៣ឆ្នាំ ទីអារាមទូទំាងប្រទេស ត្រូវបានវាយកម្ទេច និងបោះបង់ចោល ។ ចំណែកវត្តទាំងអស់ក្នុងខេត្តប៉ៃលិន កាលពីអតិតកាលគឺមានត្រឹមតែ៦វត្តប៉ុណ្ណោះ ហើយឆ្លងកាត់រយៈកាលជាង១០ឆ្នាំ មកនេះ វត្តមានរហូតដល់ទៅ ៣២វត្ត។
ទៀនព្រះវស្សា និងសម្ភារៈបរិក្ខាដែលបានយកទៅប្រគេនដល់ព្រះសង្ឃគង់ចាំព្រះវស្សានាពេលនោះមាន៖ ទៀនព្រះវស្សាចំនួន៣២គូរ, អង្ករ៤០ការ៉ុង, ទឹកសុទ្ធអង្គរពូរ៉ូចំនួន៦០កេះ, ទឹកក្រូច៤០កេះ, ទឹកដោះគោ ៣២យួរ, មី៤០កេះ ស្លាដក៣២ ប្រេងម៉ាស៊ូត ៣០ប៊ីដុង និងថវិកា ១៣.២៥០.០០០រៀល (១៣លាន ពីរសែន ប្រាំម៉ឺនរៀល)។ ដោយឡែកឯកឧត្តម កើត សុធា អភិបាល នៃគណអភិបាលខេត្តប៉ៃលិនបានចូលរួមជាថវិកាចំនួន៥លានរៀលផងដែរ។
vv
[youtube id= “QtCAuhHZANc”]
