(19-01-2017) នៅព្រឹកថ្ងៃទី១៨ ខែមករា ឆ្នាំ២០១៧ នៅមន្ទីរកសិកម្មខេត្តប៉ៃលិនមានរៀបចំ ពិធីប្រកាសបញ្ចូលខណ្ឌរដ្ឋបាលព្រៃឈើ និងខណ្ឌរដ្ឋបាលជលផល និងប្រគល់ត្រាជាផ្លូវការជូនមន្ទីរកសិកម្មរុក្ខាប្រមាញ់ និងនេសាទខេត្តប៉ៃលិន ក្រោមអធិបតីភាពឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និង ឯកឧត្តម កើត សុធា អភិបាននៃគណអភិបាលខេត្តប៉ៃលិន និងមានការអញ្ជើញចូលរួមពីសំណាក់ថ្នាក់ដឹកនាំមន្ត្រីរាជការស្ថាប័នជុំវិញខេត្តផងដែរ។
បន្ទាប់ពីរបាយការណ៍លោក សាយ សុផាត ប្រធានមន្ទីរកសិកម្មខេត្តអានរបាយការណ៍ ពីលទ្ធផលការងារបង្កបង្កើនផលរបស់ប្រជាពលរដ្ឋខេត្តរួចមក តំណាងនាយកដ្ឋានបុគ្គលិកបានអានប្រកាសលេខ ៦០៩ ប្រ.ក របស់ក្រសួងកសិកម្ម ស្តីពីការប្តូរឈ្មោះមន្ទីរកសិកម្មររាជធានីខេត្ត និងការដាក់បញ្ចូលរដ្ឋបាលព្រៃឈើ និងខណ្ឌរដ្ឋបាលជលផល អោយស្ថិតក្រោមមន្ទីរកសិកម្ម ត្រូវបានផ្ទេរក្របខ័ណ្ឌមន្រ្តីរាជការស៊ីវិលដែលកំពុងបម្រើការងារនៅតាមខណ្ឌ ផ្នែក សង្កាត់រដ្ឋបាលព្រៃឈើ និងរដ្ឋបាលជលផល នៃក្រសួងកសិកម្មរុក្ខាប្រមាញ់ និងនេសាទ អោយស្ថិតនៅក្រោមការគ្រប់គ្រងរបស់មន្ទីរកសិម្មរុក្ខាប្រមាញ់ខេត្តប៉ៃលិន ។
ឯកឧត្តម កើត សុធា អភិបាលនៃគណអភិបាលខេត្តប៉ៃលិនបានមានប្រសាសន៍ថា៖ ការប្រកាសផ្ទេរក្របខ័ណ្ឌមន្រ្តីរាជការស៊ីវិលដែលកំពុងបម្រើការងារនៅតាមខណ្ឌ ផ្នែក សង្កាត់រដ្ឋបាលព្រៃឈើ និងរដ្ឋបាលជលផល នៃក្រសួងកសិកម្មរុក្ខាប្រមាញ់ និងនេសាទ អោយស្ថិតនៅក្រោមការគ្រប់គ្រងរបស់មន្ទីរកសិម្មរុក្ខាប្រមាញ់ខេត្តប៉ៃលិន ពេលនេះគឺជាការកំណែទម្រង់វិស័យកសិកម្ម ជលផល ព្រៃឈើ និងផលិតកម្ម បសុព្យាបាល ដើម្បីលើកកំពស់ការអភិវឌ្ឍន៍លើវិស័យកសិកម្មអោយកាន់តែប្រសើរឡើង។ ឯកឧត្តមបានបន្តថា៖ក្នុងឆ្នាំនេះដំណាំដំឡូងមី ពោត ក៏ដូចស្រូវអង្ករដែរវាមានតំលៃស្រុតចុះទាំងទិន្នផល និងតម្លៃ ដែលអាចនិយាយបានថាវាមិនបានស្មើនឹងតម្លៃដើមផង។ កត្តាទាំងអស់នេះថ្នាក់ដឹកនាំខេត្តសូមគាំទ្រចំពោះចំណាត់ការដ៏សមស្របរបស់ឯកឧត្តម វេង សុខុន រដ្ឋមន្រ្តីក្រសួងកសិកម្មរុក្ខាប្រមាញ់នឹងនេសាទ លើបញ្ហាប្រឈម វិស័យកសិកម្មត្រូវតែរួមគ្នាដោះស្រាយជាអន្តរក្រសួងមិនអាចដោះស្រាយក្រសួងកសិកម្មតែឯងបានទេ។ ដូច្នេះមន្ត្រីរដ្ឋបាលជលផល និងរដ្ឋបាលព្រៃឈើទាំងអស់ត្រូវសហការជាមួយមន្ទីរ អង្គភាពនិងសមត្ថកិច្ច ពាក់ព័ន្ធក្នុងខេត្តប៉ៃលិនអោយបានជិតស្និទ្ធ ដើម្បីអភិវឌ្ឍន៍វិស័យកសិកម្មអោយរីកចំរើនឡើង និងរួមគ្នាទប់ស្កាត់បទល្មើសកាប់បំផ្លាញព្រៃឈើនិងបទល្មើសជលផលអោយបានម៉ឺងម៉ាត់ ។
ក្នុងឱកាសនោះផងដែរឯកឧត្តម ណៅ ធួក រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា៖ ការប្រកាសបញ្ចូលខណ្ឌរដ្ឋបាលព្រៃឈើ និងខណ្ឌរដ្ឋបាលជលផល នៅពេលនេះ គឺជាការកែទំរងគ្រប់គ្រងរដ្ឋបាលរបស់រាជរដ្ឋាភិបាលក៏ដូចជាក្រសួងកសិកម្ម ដើម្បីអោយការងារកាន់តែមានប្រសិទ្ធភាពខ្ពស់ ហើយយើងត្រូវតែអនុវត្តន៍អោយបានខ្ជាប់ខ្ជួន គោរពតាមសេចក្តីប្រកាស អនុវត្តន៍តាមឋានុក្រមផងដែរ។ ឯកឧត្តមបន្តទៀតថា៖ មន្ទីរកសិកម្មខេត្តប៉ៃលិន គួរបែងចែកដែនសមត្ថកិច្ចការងារ និងចុះមូលដ្ឋានអោយបានជាប្រចាំទាក់ទងទៅនឹងការបង្ហាត់បង្ហាញបច្ចេកទេសកសិកម្មថ្មីៗងាយៗជូនដល់ប្រជាពលរដ្ឋ ដែលបច្ចុប្បន្ននេះពួកគាត់ធ្វើកសិកម្មពឹងផ្អែកលើធម្មជាតិទាំងស្រុង ដែលបញ្ហានេះធ្វើអោយទទួលបានទិន្និផលទាបនិងខាតបង់ថវិកា។ទន្ទឹមនេះថ្នាក់ដឹកនាំមន្ត្រីគ្រប់ថ្នាក់ត្រូវជម្រុញការលើកកម្ពស់ការអភិវឌ្ឍន៍សមត្ថភាពរបស់ខ្លូនអោយបានល្អដើម្បីជួយផ្តល់គម្រោងផ្សេរៗ ក្នុងការលើកកម្ពស់ការងារផ្សព្វផ្សាយកសិកម្ម ការរៀបចំមណ្ឌលកសិកម្មឃុំ សង្កាត់ ជាពិសេសផ្សព្វផ្សាយបច្ចេកទេសធ្វើកសិកម្ម ជូនប្រជាពលរដ្ឋអោយយល់ដឹង និងលើកពស់ជីវភាពរបស់កសិករយើងអោយកាន់តែប្រសើឡើង។
អត្ថបទ៖ កុល កាយណា
vv
[youtube id= “TxZyOKElcUE”]
