(30-08-2015) ខេត្តប៉ៃលិន៖ ព្រឹកថ្ងៃទី៣០ ខែសីហា ឆ្នំា២០១៥ នៅមន្ទីរសង្គមកិច្ចខេត្តប៉ៃលិន បានរៀបចំចែកអំណោយ ជូនប្រជាពលរដ្ឋខ្វះខាតស្បៀងចំនួន១៣០៣គ្រួសារមកពីសង្កាត់ទាំង៤នៅក្នុងក្រុងប៉ៃលិន ក្រោមអធិបតីភាព ឯកឧត្តម កើតសុធា អភិបាលនៃគណៈអភិបាលខេត្តប៉ៃលិន ។
លោក ស៊ុន យី អភិបាលក្រុងប៉ៃលិនបានឲ្យដឹងថាៈអំណោយដែលចែកជូនបងប្អូនប្រជាពលរដ្ឋនាពេលនេះគឺជាអំណោយរបស់រាជរដ្ឋាភិបាលតាមរយះមន្ទីរសង្គមកិច្ចខេត្ត ហើយចែកជូនដល់បងប្អូនប្រជាពលរដ្ឋខ្វះខាតស្បៀងចំនួន១៣០៣គ្រួសារមកពី៤សង្កាត់ទូទាំងក្រុងប៉ៃលិន។
ឯកឧត្តម កើត សុធា អភិបាលនៃគណៈអភិបាលខេត្តប៉ៃលិនបានមានប្រសាសន៍ថាៈរាជរដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានគិតគូខ្ពស់ពីសុខទុក្ខរបស់បងប្អូនប្រជាពលរដ្ឋនៅទូទាំងប្រទេស។ ជាក់ស្តែងពេលដែលប្រជាពលរដ្ឋយើងជួបគ្រោះមហន្តរាយផ្សេងៗ រាជរដ្ឋាភិបាល ក៏ដូចជាកាកបាទក្រហមកម្ពុជាបានយកចិត្តទុកដាក់ផ្តល់អំណោយជូនបងប្អូនគ្រប់ពេលវេលាដោយមិនប្រកាន់និន្នាការនយោបាយអ្វីឡើយ។ឯកឧត្តមបន្តថាៈការផ្តល់អំណោយ របស់រាជរដ្ឋាភិបាលនាពេលនេះគឺជាការឆ្លើយតបនូវការខ្វះខាតរបស់បងប្អូន ខណៈពេលនេះនៅទូទាំងខេត្តប៉ៃលិនមានភាពរាំងស្ងួតអូសបន្លាយយូរធ្វើឲ្យផលដំណាំខូចខាត។ហើយបើទោះបីជាអំណោយទាំងនេះវាមានចំនួនតិចតួចក្តី តែវាអាចយកទៅដោះស្រាយនូវការលំបាកខ្វះខាតរបស់បងប្អូនបានមួយកំរិតដែរ។ដូច្នេះសូមបងប្អូនត្រូវបន្តយកចិត្តទុកដាក់ខិតខំបង្កបង្កើនផលដាំដំណាំស្បៀងគ្រប់មុខនិងចិញ្ចឹមសត្វគ្រប់ប្រភេទដើម្បីដោះស្រាយជីវភាពរបស់បងប្អូនឲ្យបានប្រសើឡើង ជាពិសេសត្រូវចេះសំអាតអនាម័យនិងថែទាំសុខភាពដោយរស់នៅស្អាត ហូបស្អាត ផឹកស្អាត។ឯកឧត្តមក៏បានអំពាវនាវដល់បងប្អូនប្រជាពលរដ្ឋនៅទូទាំងខេត្តប៉ៃលិនត្រូវចូលរួមសហការជាមួយកម្លាំងសមត្ថកិច្ច អាជ្ញាធរមូលដ្ឋានឲ្យបានជិតស្និទ្ធចូលរួមអនុវត្តគោលនយោបាយភូមិឃុំមានសុវត្តភាពទាំង៩ចំណុចឲ្យមានប្រសិទ្ធភាព លប់បំបាត់គ្រឿងញៀន ល្បែងស៊ីសង ចោរកម្មកុំឲ្យមាន ក្នុងភូមិឃុំសង្កាត់របស់យើង។អំណោយដែលចែកជូនប្រជាពលរដ្ឋទាំង១៣០៣គ្រួសារដោយ១គ្រួសារៗទទួលបានអង្ករ២៥គីឡូក្រាម។
[youtube id= “XRlEO7dW5C0”]
