(07-10-2015) ប៉ៃលិន៖ ថ្ងៃទី០៧ ខែតុលា ឆ្នាំ២០១៥ ឯកឧត្តម កើត សុធា អភិបាលនៃគណៈអភិបាលខេត្តប៉ៃលិន និងលោក ជីបា តៃហ្សូ តំណាងស្ថានទូតជប៉ុនប្រចាំព្រះរាជាណាចក្រកម្ពុជា បានអញ្ជើញជាអធិបតីក្នុងពីធីសម្ពោធផ្លូវបេតុងអាមេមួយខ្សែស្ថិតក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ពិធីនេះក៏មានការចូលរួមពីមន្រ្តីរាជការ អាជ្ញាធរ ប្រជាពលរដ្ឋ លោកយាយលោកតា និងសិស្សានិសិស្សសរុប៤២០នាក់។
លោក ជីបា តៃហ្សូ តំណាងឯកឧត្តម កូរ៉ា ម៉ាម៉ារុជិ ឯកគ្គរាជទូតជប៉ុនប្រចាំព្រះរាជាណាចក្រកម្ពុជា បានមានប្រសាសន៏ថា ប្រទេសជប៉ុន និងព្រះរាជាណាចក្រកម្ពុជា បានបន្តកិច្ចសហប្រតិបត្តិការជាមិត្តភាពតាំងពីដើមរហូតមក ហើយកិច្ចសហប្រតិបត្តិការនេះបានវេញចំណងសាមគ្គី ជាមិត្តភាពយ៉ាងល្អប្រសើររវាងប្រជាជន និងរាជរដ្ឋាភិបាលនៃប្រទេសទាំងពីរ។ លោកបន្តថា នេះជាសមិទ្ធិផលថ្មីមួយទៀតក្រោមកិច្ចសហការដ៏ជិតស្និតរវាង ស្ថានទូតជប៉ុនប្រចាំព្រះរាជាណាចក្រកម្ពុជា និងអាជ្ញាធរខេត្តប៉ៃលិន ដែលបាននាំនូវផលប្រយោជន៏ដល់ប្រជាជនក្នុងសហគមន៏ ក្នុងភូមិផ្សារព្រំ នាខេត្តប៉ៃលិន នោះគឺប្រជាពលរដ្ឋអាចអាស្រ័យក្នុងការធ្វើដំណើរទៅមកបានស្រួល ជាពិសេសសិស្សានុសិស្សក្នុងសាលាបឋមសិក្សាផ្សារព្រំ និងព្រះសង្ឃក្នុងវត្ត ដែលអាស្រ័យលើផ្លូវនេះដោលផ្ទាល់។
ឯកឧត្តម កើត សុធា អភិបាលនៃគណៈអភិបាលខេត្តប៉ៃលិន សំដែងនូវក្តីសប្បាយរីករាយជាមួយប្រជាពលរដ្ឋ លោកយាយ លោកតា សិស្សានុសិស្ស និងព្រះសង្ឃដែលទទួលបាននូវចំណងដៃថ្មីគឺផ្លូវលំធ្វើពីបេតុងអាមេ ដែលមានលក្ខណៈរឹងមាំល្អ និងបានបង្ករលក្ខណៈងាយស្រួលក្នុងការធ្វើដំណើរទៅមក។ ឯកឧត្តមក៏បានថ្លែងអំណរគុណយ៉ាងជ្រាលជ្រៅចំពោះប្រជាជន ក៏ដូចជារាជរដ្ឋាភិបាលជប៉ុន តាមរយះលោកជីបា តៃហ្សូ ដែលតែងតែផ្តល់នូវកិច្ចសហប្រតិបត្តិការល្អជាមួយរាជរដ្ឋាភិបាលកម្ពុជា ជាពិសេសជាមួយអាជ្ញាធរខេត្តប៉ៃលិន និងជំនាញគ្រប់ផ្នែករបស់ខេត្តប៉ៃលិន ដែលបាននាំមកនូវសមិទ្ធិផលនេះជូនប្រជាពលរដ្ឋក្នុងសហគមន៏បានប្រើប្រាស់ និងជាគុណប្រយោជន៏សាធារណៈ។ ជាមួយគ្នានេះឯកឧត្តមក៏បានសំណូមពរដល់រាជរដ្ឋាភិបាល និងប្រជាជនជប៉ុន បន្តពិនិត្យលទ្ធភាពក្នុងការគាំទ្រដល់គម្រោងនានាជាច្រើនទៀតក្នុងខេត្តប៉ៃលិន ដែលជាតម្រូវការចាំបាច់របស់ប្រជាពលរដ្ឋក្នុងខេត្ត ដូចជាបញ្ហាទឹក និងប្រព័ន្ធស្រោចស្រប ការកសាងផ្លូវ ស្ពាន លូ។ល។ ឯកឧត្តមបានសំណូមពរដល់ប្រជាពលរដ្ឋដែលអាស្រ័យផលលើផ្លូវសាធារណៈនេះ ជួយថែរទាំឲ្យបានល្អដើម្បីធានាការប្រើប្រាស់បានយូរអង្វែង។
បើតាមរបាយការណ៍របស់លោក ឌិន គឹម ប្រធានមន្ទីរសាធារណៈការខេត្តប៉ៃលិន បានឲ្យដឹងថា ផ្លូវលំធ្វើពីបេតុងអាមេនេះ ត្រូវបានស្ថាបនាឡើងដោយមន្ទីរសាធារណៈការខេត្ត ក្រោមហិរញ្ញប្បទានរបស់ប្រជាជន និងរដ្ឋាភិបាលជប៉ុន ក្រោមគម្រោង កូសាណូណិរបស់ស្ថានទូតជប៉ុន ប្រចាំព្រះរាជាណាចក្រកម្ពុជា។ ផ្លូវបេតុងនេះ មានប្រវែង៥០០ម និងទទឹង៤ម បានចំណាយថវិកាអស់ចំនួន ៩៣.៩៥៧$ ដោយតភ្ជាប់ពីផ្លូវជាតិលេខ៥៧ ត្រង់ចំណុចផ្សារព្រំ និងភ្ជាប់ពីផ្លូវធំចូលទៅកាន់សាលារៀនបឋមសិក្សាផ្សារព្រំ និងវត្តសារវណ្ណ។ ក្នុងគម្រោងផ្លូវនេះត្រូវបានស្ថាបនាចាប់តាំងពីថ្ងៃទី២៤ ខែមេសាឆ្នាំ២០១៤ និងស្ថាបនារួចរាល់ជាស្ថាពរនៅក្នុងខែតុលា ឆ្នាំ២០១៥នេះ ហើយផ្លូវបេតុងអាមេនេះបានផ្តល់ផលប្រយោជន៏ដោយផ្ទាល់លើប្រជាជនចំនួន២៥០គ្រួសារ និងប្រជាជនក្នុងភូមិទាំងមូលប្រមាណជាង៨០០គ្រួសារ ដោយសារផ្លួវនេះជាផ្លូវចូលទៅកាន់ទីអារាម និងសាលារៀន ហើយបញ្ហាការកែលម្អប្រព័ន្ធលូ គឺជាវិស័យមួយអាទិភាពមួយនៃកិច្ចសហប្រតិបត្តិការរបស់ជប៉ុនសម្រាប់កម្ពុជាហើយជាក់ស្តែងគម្រោងកែលម្អប្រព័ន្ធលូជាច្រើនត្រូវបានអនុវត្តទាំងទីក្រុង និងតំបន់ជនបទ។
[youtube id= “puZF-kUKYXo”]
