ឯកឧត្តមកើត សុធា អភិបាលខេត្តប៉ៃលិនដឹកនាំគណៈប្រតិភូខេត្តអញ្ជើញជួបសំណេះសំណាល និងពិភាក្សាការងារជាមួយអភិបាលខេត្តខេត្តច័ន្ទថបុរី


​(22-01-2016) ប៉ៃលិន៖ នៅ​រសៀល​ថ្ងៃ​ទី២២ ​ខែមករា​ ឆ្នាំ២០១៦ ​ឯក​ឧត្តម ​កើត ​សុធា ​អភិបាល​នៃ​គណៈ​អភិ​បាល​ខេត្ត​ប៉ៃលិន ​រួម​ដំណើរ​លោក​ ជំទាវ​ ស៊ុំ​ ហៀង​ ប្រធាន​សភា​ពាណិជ្ជ​កម្ម​ខេត្ត​ លោក​ជំទាវ​ ជា​លាប​ អភិ​បាល​រង​ខេត្ត​ប៉ៃលិន​  លោក​ ឌិន​ គឹម​ប្រធាន​មន្ទីរ​សាធាណៈ​ការ​ និង​ដឹក​ជញ្ជូន​ខេត្ត ​លោក ​សុខ ​សាវុធ ​ប្រធាន​ច្រក​អន្តរ​ជាតិ​ព្រំ​ប៉ៃលិន ​ព្រម​ទាំង​មន្ត្រី​រាជ​ការ​ស្ថាប័ន​ជុំវិញ​ខេត្ត​មួយ​ចំនួន​ទៀត ​បាន​អញ្ជើញ​ជួប​សំណេះ​សំណាល​ និង​ពិភាក្សា​ការងារ​ជា​មួយ ​ឯក​ឧត្តម ​ស៊ុម ​សាក់​បរិ​សុទ្ធ​ថូ ​ហេម​ថា​នុន ​អភិ​បាល​ខេត្ត​ច័ន្ទ​ថបុរី​ និង​មន្រ្តី​រាជ​ការ​ស្ថាប័ន​ពាក់​ពន័្ធ​ក្នុង​ខេត្ត​មួយ​ចំនួន​ទៀត ​ដែល​ពិធី​សំណេះ​សំណាល​ធ្វើ​ឡើង​នៅ​សាលា​ខេត្ត​ចាន់​ថបុរី​នៃ​ព្រះរាជា​ណាចក្រ​ថៃ​។​

​ឯក​ឧត្តម ​កើត ​សុធា ​អភិបាល​ខេត្ត​ប៉ៃលិន​បាន​សំដែង​នូវ​ការ​រីករាយ​ដែល​បាន​ដឹក​នាំ​គណៈ​ប្រតិភូ​ខេត្ត​ប៉ៃលិន​មក​ជួប​ជា​មួយ​ថ្នាក់​ដឹកនាំ​រដ្ឋបាល​ខេត្ត​ច័ន្ទ​ថបុរី​ដើម្បី​ពិភាក្សា​ការងារ​ និង​ពង្រឹង​កិច្ច​សហការ​និង​ទំនាក់​ទំនង​ល្អ​រវាង​ខេត្ត​ប៉ៃលិន ​និង​ខេត្ត​ចាន់​ថបុរី​។​ឯក​ឧត្តម​បន្ត​ថាៈ​ ក្នុង​កិច្ច​ពិភាក្សា​នេះ​ថ្នាក់​ដឹកនាំ​ខេត្ត​ប៉ៃលិន​មាន​បំណង​លើក​យក​សំនូម​ពរ​មួយ​ចំនួន​ដាក់​ជូន ​ស្ថាប័ន​ពាក់​ព័ន្ធ​នៅ​ខេត្ត​ចាន់​ថបុរី​នៃ​ប្រទេស​ថៃ​ដើម្បី​ ដោះ​ស្រាយ ​និង​ធ្វើ​ការងារ​ជា​មួយ​គ្នា​អោយ​បាន​ល្អ ​ក្នុង​ន័យ​បំរើ​ប្រជា​ពល​រដ្ឋ​ប្រទេស​ទាំង​ពីរ​កម្ពុជា​ ថៃ​ អោយ​ទទួល​បាន​ផល​ប្រយោជន៍​ស្មើ​ភាព​គ្នា ​ ជាពិសេស​ប្រ​ជា​ពល​រដ្ឋ​កម្ពុជា​ដែល​មក​ធ្វើ​ជា​កម្មករ​ និង​មក​ព្យា​បាល​ជំងឺ​នៅ​ប្រទេស​ថៃ​សូម​ជួយ​សម្រួល​ និង​រក្សា​ការពារ​សន្តិ​សុខ​សុវត្តិ​ភាព​អោយ​បាន​ល្អ​។​ ឯក​ឧត្តម​បន្ត​ទៀត​ថា​៖​ នៅ​ឆ្នាំ​២០១៥​កន្លង​ទៅ​នេះ​ខេត្ត​យើង​ទាំង​ពីរ​ប៉ៃលិន​ និង​ចាន់​ថបុរី​មាន​កិច្ច​សហ​ប្រតិ​បត្តិ​ការ​គ្នា​ល្អ​លើ​គ្រប់​វិស័យ​ ជាពិសេស​លើ​វិស័យ​សន្តិ​សុខ​សង្គម ​បាន​ចូល​រួម​ទប់​ស្កាត់​បទ​ល្មើស​ឆ្លង​ដែន​នានា​ជា​ប្រចាំ​ ធ្វើ​អោយ​ព្រំ​ដែន​មួយ​មាន​សុខ​សន្តិ​ភាព​និង​ការ​អភិវឌ្ឍន៍​ ។​ដូច្នេះ​នៅ​ឆ្នាំ​២០១៦​នេះ​ខេត្ត​យើង​ទាំង​ពីរ​ត្រូវ​បន្ត​កិច្ច​សហ​ប្រត្តិ​បតិ​ការ​គ្នា​អោយ​កាន់​តែ​ល្អ​បន្ថែម​ទៀត ​ បើ​មាន​បញ្ហា​អ្វី​កើត​ឡើង​យើង​ត្រូវ​និយាយ​គ្នា​ដោយ​ត្រង់​ទៅ​ត្រង់​មក​ ហើយ​ដោះ​ស្រាយ​បញ្ហា​នៅ​នឹង​កន្លែង​តែ​ម្តង​។ ​ចំពោះ​គំរោង​សាង​សង់​ស្ពាន​មិត្ត​ភាព​កម្ពុជា ​ថៃ ​នៅ​ច្រក​អន្តរ​ជាតិ​ព្រំ​ប៉ៃលិន ​និង​បាន​ប៉ា​កាដ​ចាន់​ថបុរី​ ឯក​ឧត្តម ​កើត​សុធា ​ក៏​បាន​ឯក​ភាព ​ទៅ​តាម​ការ​សម្រេច​របស់​រដ្ឋា​ភិបាល​កម្ពុជា​និង​រាជ​រដ្ឋា​ភិបាល​ថៃ ​ដើម្បី​អោយ​ប្រជា​ពល​រដ្ឋ​ប្រទេស​ទាំង​ពីរ​ធ្វើ​ដំណើរ​ឆ្លង​កាត់ ​និង​ដឹក​ជញ្ជូន​កសិ​ផល​អោយ​បាន​ទាន់​ពេល​វេលា​។​ ឯក​ឧត្តម ​ក៏​បាន​ស្នើ​ដល់​អភិបាល​ច័ន្ទ​ថបុរី​ បើក​ច្រក​ល្បៀង​មួយ​ទៀត ​និង​បន្ត​ជួយ​បន្ថែម​អគ្គីសនី​បញ្ជូន​មក​ខេត្ត​ប៉ៃលិន​ព្រោះ​ប្រជា​ពល​រដ្ឋ​តម្រូវ​ការ​ប្រើ​ប្រាស់​ច្រើន​ ។​

ឯក​ឧត្តម​ ស៊ុម​សាក់​បរិសុទ្ធ​ថូ ​ហេម​ថា​នុន ​អភិបាល​ខេត្ត​ច័ន្ទថ​បុរី​មាន​ប្រសាសន៏​កោត​សរសើរ​និង​ថ្លែ​អំណរ​គុណ​ដល់​ថ្នាក់​ដឹកនាំ​មន្ត្រី​រាជ​ការ​ខេត្ត​ប៉ៃលិន ​ដែល​បាន​ដឹកនាំ​ប្រតិភូ​អញ្ជើញ​មក​ខេត្ត​ចាន់​ថបុរី​ ដើម្បី​ជួប​ពិភាក្សា​ការងារ​លើ​កិច្ច​សហ​ប្រតិបត្តិ​ការ​ ទំនាក់​ទំនង​គ្នា​លើ​គ្រប់​វិស័យ ​និង​លើក​ឡើង​ពី​បញ្ហា​ប្រឈម​និង​ សំនូម​ពរ​ផង​ដែរ​។​ ចំពោះ​សំណូម​ពរ​របស់​អភិបាល​ខេត្ត​ប៉ៃលិន ​ឯក​ឧត្តម​អភិបាល​ខេត្ត​ចាន់​បុរី​ធ្វើ​ការ​ឆ្លើយ​តប​គឺ​ ៖​ទី១​/​ការ​សាង​សង់​ស្ពាន​នៅ​ច្រក​អន្តរ​ជាតិ​ព្រំ​ប៉ៃលិន​និង​បាន​ប៉ាកាដ​ច័ន្ទ​បុរី​ ដែល​មាន​គំរោង​ចំណាយ​ជិត​៤០ម៉ឺន​ដុល្លា​នោះ​ គឺ​ភាគី​ថៃ​និង​កម្ពុជា​សម្រេច​កសាង​នា​ពេល​ឆាប់​ៗ​ខាង​មុខ​នេះ​។​ទី២/​ការ​ស្នើ​បើក​ច្រក​ល្បៀង​មិន​ទាន់​មាន​គោល​ការណ៍​នោះ​ទេ ​ព្រោះ​ត្រូវ​ធ្វើ​ស្ពាន​ និង​ធ្វើ​ផ្សា ​រួច​សិន​ ទើប​យក​បញ្ហា​បើ​ច្រក​នេះ​មក​ពិភាក្សា​ទៀត​។​ទី៣/​ការ​ខ្វះ​ខាត​ភ្លើង​អគ្គីសនី​ប្រើ​ប្រាស់​នៅ​ខេត្ត​ប៉ៃលិន​សូម​ អោយ​ស្ថាប័ន​ពាក់​ព័ន្ធ​យក​ទៅ​ពិភាក្សា​គ្នា​បន្ថែម​ទៀត​។​ទី៤/​ការងារ​ទំនាក់​ទំនង​សន្តិ​សុខ​តាម​បណ្តោយ​ព្រំដែន​ប៉ៃលិន​និង​ច័ន្ទថ​បុរី ​សូម​អោយ​កង​កំលាំង​ប្រដាប់​អាវុធ​គ្រប់​ប្រភេទ​និង​ស្ថាប័ន​ពាក់​ព័ន្ធ​ទាំង​អស់​ត្រូវ​តែ​មាន​កិច្ច​សហ​ប្រតិ​បត្តិ​គ្នា​ល្អ​បន្ថែម​ទៀត ​និង​ពង្រឹង​សន្តិ​សុខ​សណ្តាប់​នៅ​តាម​តំបន់​ព្រំដែន​អោយ​កាន់​តែ​ទ្វេ​ថែម​ទៀត​ ដើម្បី​បំរើ​សុខ​សន្តិ​ភាព​ជូន​ប្រជា​ពល​រដ្ឋ​ប្រទេស​ជាតិ​ទាំង​ពីរ​កម្ពុជា​ ថៃ​។​

តមក​ថ្ងៃ​ដដែល​នេះ ​ឯក​ឧត្តម​ កើត ​សុធា ​អភិបាល​ខេត្ត​ប៉ៃលិន​ និង​គណៈ​ប្រតិ​ភូ​ខេត្ត​ប៉ៃលិន​ក៏​បាន​អញ្ជើញ​ជួប​សំណេះ​សំណាល​និង ​ពិភាក្សា​ការងារ​ជា​មួយ​ លោក​ វិរៈ​នា​វា​ឯក​ ជើង​ទឹក​ ថ្វី​ វ៉ុង​វ៉ាន ​មេ​បញ្ជា​ការ​ប្រតិ​បត្តិ​ការ​សឹក​រង​ខេត្ត​ចាន់​ថបុរី​ នៅ​ទី​បញ្ជា​ការ​តំបន់​ប្រតិ​បត្ត​ការ​សិក​រង​ខេត្ត​ចាន់​ថបុរី​។

​ក្នុង​ជំនួប​ជា​មួយ​មេ​បញ្ជា​ការ​តំបន់​ប្រតិ​បត្តិ​ការ​រង​ខេត្ត​ចាន់​បុថរី​ ឯក​ឧត្តម​កើត ​សុធា ​អភិបាល​ខេត្ត​ប៉ៃលិន ​បាន​ពិភាក្សា​គ្នា​ដោយ​ផ្តោត​លើ​ពង្រឹង​កិច្ច​សហ​ប្រតិបត្តិ​ការ​រវាង​កង​កម្លាំង​ប្រដាប់​អាវុធ​កម្ពុជា​ និង​កង​កម្លាំង​ប្រដាប់​អាវុធ​ថៃ ​ក្នុង​កិច្ច​សហការ​ការពារ​សន្តិ​សុខ​សុវត្តិ​ភាព​ជូន​ប្រជា​ពល​រដ្ឋ​ប្រទេស​ទាំង​ពីរ​ដែល​រស់​នៅ​តាម​បណ្តោយ​ព្រំដែន ​និង ​រួមគ្នា​ទប់​ស្កាត់​រាល់​បទ​ល្មើស​ឆ្លង​ដែន ​ជា​ពិសេស​បន្ត​ពង្រឹង​កិច្ច​សហ​ការ​សាមគ្គី​ភាព​មិត្ត​ភាព​អោយ​កាន់​តែ​ល្អ​ប្រសើរ​ឡើង ​ដើម្បី​អោយ​ព្រំ​ដែន​ប្រទេស​យើង​ទាំង​ពីរ​ប្រែ​ក្លាយ​ជា​ព្រំ​ដែន​សុខ​សន្តិ​ភាព ​និង​មាន​កសាង​អភិវឌ្ឍន៍​រីក​ចំរើន​លើ​គ្រប់​វិស័យ ​លើក​កំពស់​ជីវ​ភាព​រស់​នៅ​ប្រជា​ពល​រដ្ឋ​អោយ​ប្រសើរ​ឡើង​។​

cpp-22-01-2016-005 cpp-22-01-2016-006 cpp-22-01-2016-007 cpp-22-01-2016-008 cpp-22-01-2016-009 cpp-22-01-2016-010 cpp-22-01-2016-011 cpp-22-01-2016-012 cpp-22-01-2016-013 cpp-22-01-2016-014vv

[youtube id= “K_72gyd8e7U”]