សិស្សានុសិស្ស ប្រជាពលរដ្ឋ និងមន្រ្តីរាជការសរុបចំនួនជិត៤០០នាក់ទទួលបានការផ្សព្វផ្សាយច្បាប់ចរាចរណ៍ផ្លូវគោក


​(23-11-2016) ប៉ៃលិន៖ ថ្ងៃទី១៣ ​ខែវិច្ឆិកា​ ឆ្នាំ២០១៦,​ មាន​សិស្សា​នុសិស្ស ,​ ប្រជា​ពល​រដ្ឋ ​និង​មន្រ្តី​រាជ​ការ​ខេត្ត​ប៉ៃលិន ​សរុប​ចំនួន​ជិត​៤០០នាក់ ​ទទួល​បាន​ការ​ផ្សព្វ​ផ្សាយ​ច្បាប់​ចរាចរណ៍​ផ្លូវ​គោក ​ពី​ក្រសួង​ទំនាក់​ទំនង​រដ្ឋ​សភា ​និង​ព្រឹទ្ធ​សភា ​និង​អធិ​ការ​កិច្ច​។ ​ពិធី​ផ្សព្វ​ផ្សាយ​នេះ​បាន​ធ្វើ​ឡើង​នៅ​វិទ្យា​ល័យ​ហ៊ុន​សែន​ក្រុង​ទេព​និម្មិត​ ហ៊ុន​សែន​ ស្ថិត​ក្នុង​ភូមិ​អូរតា​ពុក​ក្រោម ​សង្កាត់​ទួល​ល្វា ​ក្រុង​ប៉ៃលិន ​ខេត្ត​ប៉ៃលិន ​ដោយ​មាន​ការ​អញ្ជើញ​ចូល​រួម​ពី​សំណាក់​ឯក​ឧត្តម ​ស៊ុំ ​រុំ ​អនុ​រដ្ឋ​លេខា​ធិការ​ក្រសួង​ទំនាក់​ទំនង​រដ្ឋ​សភា ​ព្រឹទ្ធ​សភា ​និង​អធិការ​កិច្ច​, ឯក​ឧត្តម​ អៀង​ វុធ​ អភិបាល​ស្តីទី​ខេត្ត​ប៉ៃលិន ​ព្រម​ទាំង​លោក​ប្រធាន ​អនុ​ប្រធាន​មន្ទីរ​ លោក​ស្នង​ការ​នគរ​បាល​ខេត្ត​ កង​រាជ​អាវុធ​ហត្ថ​ខេត្ត ​និង​ តំណាង​មន្ទីរ​សាធារណៈ​ការ ​និង​ដឹក​ជញ្ជួន​ផង​ដែរ​។​

​ការ​ផ្សព្វ​ផ្សាយ​នេះ​បាន​ប្រព្រឹត្ត​ទៅ​ពេញ​មួយ​ព្រឹក​ដោយ​មាន​វាគ្មិន​ជំនាញ​បង្ហាញ​ពី ​ច្បាប់​ចរាចរណ៍​ផ្លូវ​គោក​ដែល​មាន​៖ ​សញ្ញា​ចរាចរណ៍ ,​ អ្នក​បើកបរ​យាន្ត​ជំនិះ ​, ការ​ប្រើ​ភ្លើង​ និង​សូរ​ស័ព្ទ​យាន្ត​ជំនិះ ​, ថ្មើ​ជើង​ អ្នក​ជិៈ ​ឬ​សត្វ ​, ករណី​មាន​គ្រោះ​ថ្នាក់​ចរាចរណ៍ ​,ការ​គ្រប់​គ្រង​យាន្ត​ជំនិះ ​និង​ការ​ដឹក​ជញ្ជូន ,​ សមត្ថ​កិច្ច ​និង​សិទ្ធ​អំណាច​របស់​នគរ​បាល​ចរា​ចរណ៍ ​, និង ​ទោស​បញ្ញាត្តិ ​ ព្រម​ទាំង​មាន​ការ​បក​ស្រាយ​នូវ​សំនួរ​របស់​អ្នក​ចូល​រួម​ផង​ដែរ​។​

​លោក ​ម៉ម ​សំណាង ​ប្រធាន​មន្ទីរ​ទំនាក់​ទំនង​រដ្ឋ​សភា ​និង​ព្រឹទ្ធ​សភា ​និង​អធិការ​កិច្ច​ខេត្ត​ប៉ៃលិន​បាន​មាន​ប្រសាសន៍ថា​ ខេត្ត​ប៉ៃលិន​ស្ថិត​នៅ​ភាគ​ពាយព្យ​នៃ​ព្រះរាជា​ណា​ចក្រ​កម្ពុជា,​ មាន​ចម្ងាយ​៣៧១​ គីឡូ​ម៉ែត្រ​ពី​រាជ​ធានី​ភ្នំពាញ​។ ​ខេត្ត​ប៉ៃលិន​មាន​ផ្ទៃ​ដី​ចំនួន​១.០៦២​,៥២ ​គីឡូ​ម៉ែត្រ​ការ៉េ ,​ មាន​ក្រុង​មួយ​ និង​ស្រុក​មួយ​, មាន​៨ឃុំ​សង្កាត់ ​, មាន​៩០ភូមិ ​និង​មាន​ប្រជា​ពល​រដ្ឋ​សរុប​ចំនួន​១៥.​៥៦៦​គ្រួសារ ​និង​មាន​មនុស្ស​រាយ​ ៦៦​.៩៧៦​នាក់​។​

​ឯក​ឧត្តម ​ស៊ុំ ​រុំ ​អនុ​រដ្ឋ​លេខា​ធិការ​ក្រសួង​ទំនាក់​ទំនង​រដ្ឋ​សភា​ ព្រឹទ្ធ​សភា ​និង​អធិការ​កិច្ច​ និង​ ឯក​ឧត្តម​ អៀង ​វុធ ​អភិបាល​ស្តីទី​ខេត្ត​ប៉ៃលិន​បាន​មាន​ប្រសាសន៍​ថា ​ការ​ផ្សព្វ​ផ្សាយ​ច្បាប់​ចរាចរណ៍​ផ្លូវ​គោក​នា​ពេលនេះ​គឺ​ក្នុង​គោល​បំណង​ដាស់​ស្មារតី​អោយ​សិស្សា​នុសិស្ស​ ប្រជា​ពល​រដ្ឋ ​មន្រ្តី​រាជការ ​ទាំង​អស់​ដែល​ប្រើប្រាស់​ផ្លូវ​ថ្នល់​សាធរណៈ​ អោយ​ផ្លាស់​ប្តូ​ឥរិយា​បទ​ដែល​ធ្លាប់​មាន​ភាព​អនា​ធិប​តេយ្យ ​មក​ប្រកាន់​ឥរិយា​បទ​ដែល​មាន​សណ្តាប់​ធ្នាប់​ របៀប​រៀប​រយ  ​,គោរព​ច្បាប់​ចរាចរណ៍​ពេល​ធ្វើ​ដំណើរ​ បើក​បរ​យាន​យន្ត​គ្រប់​ប្រភេទ​។​ ឯក​ឧត្តម​បាន​មាន​ប្រសាសន៍​បន្តថា ​ចរាចរណ៍​ផ្លូវ​គោក​ជា​បញ្ហា​ចំបង​ដែល​រាជ​រដ្ឋា​ភិបាល​កំពុង​មាន​ការ​យក​ចិត្ត​ទុក​ដាក់​ និង​ព្រួយ​បារម្ភ​យ៉ាង​ខ្លាំង ​ ដោយ​សារវា​បាន​ធ្វើ​អោយ​មាន​របួស​ស្នាម ​និង ​បាត់​បង់​អាយុ​ជីវិត​ប្រជា​ពល​រដ្ឋ​ សត្វ​ បរិស្ថាន ​និង​ខូច​ខាត​ត្រព្យ​សម្បត្តិ​ជា​ច្រើន​រយ​លាន​ដុល្លា​ក្នុង​មួយ​ឆ្នាំៗ​  និង​បាន​បន្សល់​ទុក​នូវ​ស្រី្ត​មេ​ម៉ាយ ​កូន​កំព្រា​ ជន​ពិការ​ជា​ច្រើន​ក្នុង​សង្គម​ជាតិ​របស់​យើង​ ។​ ឯក​ឧត្តម ​ក៏​បាន​សំណូម​ពរ​ដល់​អាជ្ញាធរ​មាន​សមត្ថ​កិច្ច​គ្រប់​លំដាប់​ថ្នាក់ ​ត្រូវ​ខិត​ខំ​ពង្រឹង ​រឹត​បណ្តឹង​ការ​អនុ​វត្ត​ច្បាប់​ចរាចរណ៍​បន្ថែម​ទៀត ​ ដើម្បី​អោយ​ក្លាយ​ទៅ​ជា​មធ្យោ​បាយ​ដ៏​មាន​ប្រសិទ្ធ​ភាព ​សម្រាប់​ជម្រុញ​ការ​កាត់​បន្ថយ​គ្រោះ​ថ្នាក់​ចរាចរណ៍​អោយ​នៅ​មាន​កម្រិត​ទាប​បំផុត​ចូល​រួម​អភិវឌ្ឍន៍​សង្គម​សំដៅ​កាត់​បន្ថយ​ភាព​ក្រីក្រ​របស់​ប្រជា​ពល​រដ្ឋ ​ ស្រប​តាម​គោល​នយោ​បាយ​របស់​រាជ​រដ្ឋា​ភិបាល​កម្ពុជា ​ដែល​មាន​សម្តេច​អគ្គ​មហា​សេនាបតី​តេជោ​ហ៊ុន ​សែន​នាយក​រដ្ឋ​មន្រ្តី​។​ ឯក​ឧត្តម​ ក៏​បាន​អំពាវ​នាវ​អោយ​ប្រជា​ពល​រដ្ឋ​ទាំង​អស់​  ជាពិសេស​អ្នក​បើក​យាន្ត​ជំនិះ​គ្រប់​ប្រភេទ ​ ត្រូវ​ស្វែង​យល់​ និង​អនុវត្ត​អោយ​បាន​ខ្ជាប់​ខ្ជួន​នូវ​វិធាន​ការ​មួយ​ចំនួន​ដែល​បាន​ចែង​ក្នុង​ច្បាប់​ស្តីពី​ចរាចរណ៍​ផ្លូវ​គោក​មាន​ដូច​ជា​៖​ ត្រូវ​មាន​ស្លាក​សម្គាល់​យាន​យន្ត,​ ត្រូវ​មាន​ប័ណ្ណ​បើក​បរ, ​ អ្នក​បើក​ត្រូវ​មាន​ស្មារតី​ប្រុង​ប្រយ័ត្ន​, ត្រូវ​ពាក់​មួក​ និង​ខ្សែ​ក្រវ៉ាត់​ការពារ​សុវត្ថិ​ភាព​ជា​ដាច់​ខាត ,​ មិន​ត្រូវ​បើក​បរ​ហួស​ល្បឿន ​និង​ផ្ទុក​មនុស្ស​ ឬ​ទំនិញ​លើស​ចំណុះ ​, និង​បើក​បរ​ហាម​ពិសារ​គ្រឿង​ស្រវឹង​ជា​ដើម​៕​

cpp-23-11-2016-001 cpp-23-11-2016-002 cpp-23-11-2016-003 cpp-23-11-2016-004 cpp-23-11-2016-005 cpp-23-11-2016-006vv

[youtube id= “lph_yy3v-j0”]