ប្រជាពលរដ្ឋទីទាល់ក្រខ្វះខាតស្បៀង ចំនួន១០គ្រួសារ នៅភូមិអូរឈើក្រំទទួល អំណោយពីអាជ្ញាធរខេត្តប៉ៃលិន


ថ្ងៃទី០៦ ខែកញ្ញា ឆ្នាំ២០១៨ ឯកឧត្តម ផាន់ ចាន់ធុល អភិបាលខេត្តប៉ៃលិន អមដំណើរដោយលោកជំទាវ ជា លាភ អភិបាលរងខេត្ត​ លោកឧត្តមសេនីយត្រី​ ទី សុខា​ប្រធានស្នាក់ការទំនាក់ទំនងព្រំដែនកម្ពុជា-ថៃ ប្រចាំច្រកទ្វារអន្តរជាតិ​ព្រំ​ ព្រមទាំង​ក្រុម​ការងារ និងសប្បុរសជន បានអញ្ជើញចុះសំណេះសំណាលសួរសុខទុក្ខ និង​នាំយក​អំណោយជាស្បៀងអាហារ និងគ្រឿងឧបភោគ បរិភោគ ទៅឧបត្ថម្ភដល់​ប្រជាពលរដ្ឋ​ទីទាល់ក្រ ចំនួន ១០គ្រួសារ នៅ ភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្ត​ប៉ៃលិន។

ឯកត្តមផាន់ ចាន់ធុល អភិបាលខេត្តប៉ៃលិន បានមានប្រសាសន៍​ថា៖ ការចែក​អំណោយនាពេល​នេះដើម្បីចូលរួមចំណែកដោះស្រាយជីវភាព​របស់បងប្អូនប្រជាពលរដ្ឋ​ដែលកំពុងជួបការខ្វះខាត ដែលនេះជាការរួម​ចំណែករបស់អាជ្ញាធរ​ក្នុងការចែករំលែក​ធនធាន ជួយដល់ប្រជាពលរដ្ឋយើង។ ឯកឧត្តម​បានសំដែងការអាណិតអាសូរចំពោះ​ប្រជាពលរដ្ឋ និងបានណែនាំសូមអោយ​បងប្អូនប្រជា​ពលរដ្ឋទាំងអស់​ត្រូវខិតខំ​ប្រឹងប្រែង​ប្រកបមុខរបរចិញ្ជឹមជីវិត ,បង្កបង្កើតផល​ដាំដំណាំ​ឱ្យបានកាន់ច្រើន ដើម្បីបង្កើន​ជីវភាព​របស់បងប្អូនអោយធូធាជាងមុន។ ​នៅក្នុងឱកាស​នោះ​ផងដែរឯកឧត្តមក៏បានផ្តាំដល់​បងប្អូនប្រជាពលរដ្ឋទាំងអស់ ត្រូវមានការប្រុង​ប្រយ័ត្ន​ខ្ពស់​ពីសុវត្ថិភាព​ផ្ទាល់ខ្លួន ត្រូវរស់នៅដោយមានអនាម័យ, ហូបស្អាត ,ផឹងស្អាត និងសំរានក្នុងមុងជានិច្ច៕ វួច ពឿន