រដ្ឋបាលស្រុកសាលាក្រៅ សហការជាមួយមន្ទីរបរិស្ថានខេត្តចុះរើសសំរាមនៅតាមបណ្តោយផ្លូវជាតិលេខ៥៩ តំបន់ទីប្រជុំជនផ្សារសាលាក្រៅ


ដើម្បីអបអរសាទរទិវាសម្អាតពិភពលោក , នាព្រឹកថ្ងៃទី១៥ ខែកញ្ញា ឆ្នាំ២០១៨ លោក ហ៊ុន បិន នាយករដ្ឋបាលសាលាស្រុក និង លោក ឈា ហឿន  អនុ​ប្រធាន​មន្ទីរបរិស្ថាន ជាប្រធាន, បានដឹកនាំមន្រ្តីរាជការ កងកំលាំងប្រដាប់អាវុធ និងប្រជាពល​រដ្ឋ ចុះរើសសំរាមនៅតាមបណ្តោយផ្លូវជាតិលេខ៥៩ ,ពីចំណុចសាលាស្រុកសាលាក្រៅ រហូតដល់រង្វង់មូល ប្រជុំជនស្រុក ដោយកាត់តាមផ្សារសាលាក្រៅ ដើម្បីប្រមូលសំរាម មានថង់ប្លាស្ទិក សំបកដបជាដើម ដើម្បីធ្វើការកំទេចចោល។

លោក ឈា ហឿន បានបញ្ជាក់ថា ការចុះរើសសំរាមតាមដង​ផ្លូវនាពេលនេះមានគោល​បំណង៖ ទី១ ដើម្បីសំអាតតាមដងផ្លូវអោយមានសោភណភាពល្អ។ ទី២ ដើម្បីអប់រំណែនាំ បណ្តុះស្មារតីប្រជាពលរដ្ឋអោយចេះស្រឡាញ់ ថែរក្សាបរិស្ថានអោយបានល្អ ចេះទុកដាក់​សំរាម​អោយមានសុវត្ថភាព។ លោក ឈា ហឿន ក៏បានពន្យល់ណែនាំ​ប្រជាពលរដ្ឋដែល​លក់ដូរនៅតាមបណ្តោយផ្លូវ ក្នុងផ្សារសាលាក្រៅ អោយទុកដាក់សំរាម​ក្នុងធុងសំរាមអោយ​បានត្រឹមត្រូវ ពិសេសបានណែនាំដល់ប្រធានផ្សារសាលាក្រៅ ត្រូវយកចិត្តទុកដាក់មើល​ថែរក្សាបរិស្ថាន អនាម័យ ក្នុងបរិវេណផ្សារអោយបានល្អ ត្រូវចាក់ដីលុបថ្លុកទឹក​ដែល​ដក់ក្នុងបរិវេណផ្សារ និងរៀបចំកន្លែងទុកដាក់សម្រាមអោបានត្រឹមត្រូវ៕ វួច ពឿន