ថ្ងៃទី២០ ខែកញ្ញា ឆ្នាំ២០១៨ ឯកឧត្តមឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៥ និងឯកឧត្តម ផាន់ ចាន់ធុល អភិបាលខេត្តប៉ៃលិន បានអញ្ជើញជាអធិបតីក្នុងពិធីទស្សនកិច្ចសិក្សា ស្តីពីការងារ កសាងពង្រឹង អង្គភាពរឹងមាំលើគ្រប់វិស័យ នៅទីបញ្ជាការវរសេនាតូចលេខ១ ចំណុះឱ្យតំបន់ប្រតិបត្តិការសឹករងខេត្តប៉ៃលិន ស្ថិតក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន។
មានប្រសាសន៍ស្វាគមន៍, លោកវរសេនីយ៍ឯក កែម អនុជ មេបញ្ជាការរង និងជានាយសេនាធិការ នៃអង្គភាពតំបន់ប្រតិបត្តិការសឹករងខេត្តប៉ៃលិន បានឱ្យដឹងថា៖ បើទោះបី សភាពការណ៍នៅតាមជួរបន្ទាត់ព្រំដែន (ខ្មែរ-ថៃ) ក្នុងភូមិសាស្ត្រខេត្តប៉ៃលិន មានសភាពស្ងប់ស្ងាត់ធម្មតាយ៉ាងណាក៍ដោយ ក៏អង្គភាពតំបន់ប្រតិបត្តិការសឹកងខេត្ត និងអង្គភាពចំណុះ មានស្មារតីប្រុងប្រយ័ត្នខ្ពស់ បំពេញភារកិច្ចទទួលខុសត្រូវដោយចិត្តមុះមុត ក្លាហាន រឹងមាំ និងមានសាមគ្គីភាពល្អ ដោយឈរលើគោលជំហររបស់រាជរដ្ឋាភិបាល ក្នុងការការពារបូរណភាពទឹកដី និងប្រជាជន៕
ឯកឧត្តម ផាន់ ចាន់ធុល អភិបាលខេត្តប៉ៃលិន បានមានប្រសាសន៍ថា៖ ទោះក្នុងកាលៈទេសៈណាក៍ដោយ រាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន គឺតែងតែគិតគូពីសុខទុក្ខរបស់កងទ័ព និងគ្រួសារទ័ព នៅគ្រប់កងឯកភាព ដែលកំពុងឈរជើងការពារបូរណភាពទឹកដី។ ឯកឧត្តមបានប្រសាសន៍បន្តថា៖ ក្នុងនាមឯកឧត្តម ជាអភិបាលខេត្ត និងជា ប្រធានគណៈបញ្ជាការឯកភាពខេត្ត, ឯកឧត្តមនឹងជំរុញដល់បណ្តាអង្គភាពសម្ព័ន្ធមេត្រីភាពទាំងអស់ក្នុងខេត្ត ត្រូវបន្តការឧបត្ថម្ភគាំទ្រ និងចុះសួរសុខទុក្ខ ដល់កងយោធពលខេមរភូមិន្ទ ដែលកំពុងបំពេញភារកិច្ចការពារជាតិ និងប្រជាជន ដើម្បីជាការលើកទឹកចិត្ត ដល់ពួកគាត់ ដែលបានបូជាសាច់ស្រស់ ឈាមស្រស់ក្នុងបុព្វហេតុការពារជាតិមាតុភូមិ និងភាពសុខសាន្តរបស់ប្រជាពលរដ្ឋ ក៍ដូចជាផ្សារភ្ជាប់មនោសញ្ចេនារវាងសមរភូមិមុខ និងសមរភូមិក្រោយឱ្យបានកាន់តែជិតសិ្នទ្ធថែមទៀត។
ឯកឧត្តមឧត្តមសេនីយ៍ឯក ប៊ុន សេង បានមានប្រសាសន៍កោតសរសើរ ដល់អង្គភាពវរសេនាតូចលេខ១ ដែលមានការវិវឌ្ឍឈានឡើងច្រើន បើប្រៀបធៀបទៅនឹងរយ:ពេលមុន។ នេះបញ្ជាក់ពីប្រសិទ្ធភាពនៃការដឹកនាំរបស់ថ្នាក់ដឹកនាំអង្គភាពគ្រប់ជាន់ថ្នាក់ ,ការសាមគ្គីឯកភាពផ្ទៃក្នុងល្អ និងដោយអាស្រ័យមានការចូលរួមដ៏សស្រាក់សស្រាំពីនាយ-ពលទាហានគ្រប់ៗរូប និងការយកចិត្តទុកដាក់ជួយឧបត្ថម្ភគាំទ្រពីថ្នាក់ដឹកនាំខេត្ត សប្បុរសជន និងបណ្តាសម្ព័ន្ធមេត្រីភាព។ ឯកឧត្តម ក៍បានក្រើនរំលឹកដល់គ្រប់អង្គភាពទាំងអស់ ត្រូវអនុវត្តន៍ឱ្យបានរឹងមាំនូវភារកិច្ចនៃកងយោធពលខេមរភូមិន្ទ គឺការពារជាតិបូរណភាពទឹកដី ការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលស្របច្បាប់ ការពារសន្តិភាពស្ថិរភាពសង្គមជាតិឱ្យបានដាច់ខាត ទោះក្នុងតម្លៃណាក៍ដោយ។ ឯកឧត្តមក៏បានមានប្រសាសន៍ផ្តាំផ្ញើ ដល់បណ្តាអង្គភាពទាំងអស់ ជាពិសេសអង្គភាពវរសេនាតូចលេខ១ ចំណុះឱ្យតំបន់ ប្រតិបត្តិការសឹករងខេត្តប៉ៃលិន ត្រូវបន្តអនុវត្តន៍ការងារកសាងពង្រឹងអង្គភាពរឹងមាំលើគ្រប់វិស័យ ដូចដែលមានចែងនៅក្នុងផែនការកសាង ពង្រឹងអង្គភាពរឹងមាំ របស់យោធភូមិភាគទី៥ ដោយស្មារតី ទទួលខុសត្រូវខ្ពស់៕ ពិនិត្យ កែសម្រួល៖ វួច ពឿន
