ក្រុមការងារគណបក្សប្រជាជនកម្ពុជាចុះជួយឃុំសាលាក្រៅ រៀបចំពិធីពិសារអាហារសាមគ្គី អបអរសាទ័រជ័យជម្នះរបស់គណបក្សប្រជាជនកម្ពុជា


រសៀលថ្ងៃទី២២ ខែកញ្ញា ឆ្នាំ២០១៨ លោក រាម សុមាន ប្រធានក្រុមការងារគណបក្ស ប្រជាជនកម្ពុជាចុះជួយឃុំសាលាក្រៅ ស្រុកសាលាក្រៅ ខេត្តប៉ៃលិន ព្រមទាំងសមាជិក សមាជិកា​រ​ក្រុមការងារជាច្រើនរូបទៀត បានរៀបចំពិធីពិសារអាហារសាមគ្គី ជាមួយប្រជាពលរដ្ឋ ដើម្បី​សំដែង​ការអគុណចំពោះប្រជាពលរដ្ឋដែលបានគាំទ្រ បោះឆ្នោតជូនគណបក្សប្រជាជនកម្ពុជា  ក៏ដូចជា​សំដែងការអបអរសាទ័រជ័យជម្នះរបស់គណបក្សប្រជាជនកម្ពុជា ក្នុងការបោះឆ្នោតជ្រើសតាំង​តំណាងរាស្រ្តនិតិកាលទី៦ កាលពីថ្ងៃទី២៩ ខែកក្កដា ឆ្នាំ២០១៨ កន្លងទៅនេះ។

ការបោះឆ្នោតគាំទ្រគណបក្សប្រជាជនកម្ពុជាដ៏ច្រើនលើសលប់ របស់ប្រជា​ពលរដ្ឋឃុំសាលា​ក្រៅ បង្ហាញ​យ៉ាងច្បាស់ថា ប្រជាពលរដ្ឋត្រូវការសុខសន្តិភាព ស្ថិរភាព​សង្គម និងការរីកចំរើន​ផ្នែក​សេដ្ឋកិច្ច ក្រោមការដឹកនាំ របស់រាជរដ្ឋាភិបាល ដែល​មាន​សម្តេចតេជោ សែន ជានាយករដ្ឋមន្រ្តី ​និង ដោយមើលឃើញយ៉ាងច្បាស់ពីការដឹកនាំដ៏ប៉ិនប្រសប់ ឈ្លាសវៃ របស់សម្តេចតេជោ ហ៊ុន សែន​ដែលបានរំដោះប្រទេសជាតិរួចផុតពីរបបប្រល័យពូជសាសន៍ បញ្ចប់សង្គ្រាម​ផ្ទៃក្នុងដ៏រាំរ៉ៃ តាមរយៈ​គោលនយោបាយឈ្នះ ឈ្នះ និងការកសាង អភិវឌ្ឍន៍ប្រទេសជាតិ រីកចម្រើនទាំងសេដ្ឋកិច្ច វប្បធម៌ នយោបាយ ការទូត និង​លិទ្ធិ​ប្រជាធិបតេយ្យ ស្នើមុខ ស្នើមាត់លើឆាកអន្តរជាតិ ពិសេសនៅក្នុង​សហគមន៍អាស៊ាន។​ ការបោះឆ្នោតគាំទ្រគណបក្សប្រជាជនកម្ពុជាដ៏ច្រើនលើសលប់របស់ប្រជា​ពលរដ្ឋឃុំសាលា​ក្រៅ ក៏បានបង្ហាញ​យ៉ាងច្បាស់ថា ប្រជាពលរដ្ឋ មានការស្រលាញ់ គាំទ្រលោកជំទាវ បាន ស្រីមុំ ជាតំណាងរាស្រ្តមណ្ឌលប៉ៃលិន សំរាប់អាណត្តាទី៦បន្តទៀត៕

ដោយ៖ វួច ពឿន