មន្រ្តីរាជការចំនួន ៤មន្ទីរជំនាញ ក្នុងខេត្តប៉ៃលិន សរុបទាំងអស់ចំនួន២៥រូប ត្រូវបានប្រកាសតែងតាំង ផ្លាស់ប្តូរ និងប្រគល់ភារកិច្ចថ្មី តាមគុណបំណាច់ សមត្ថភាព និងអតីតភាពការងារ។ ពិធីប្រកាសតែង តាំងផ្លាស់ប្តូរ និងប្រគល់ភារកិច្ចថ្មីនេះ បានធ្វើឡើងនៅសាលាខេត្តប៉ៃលិន ក្រោមអធិបតីភាពឯកឧត្តម ផាន់ ចាន់ធុល អភិបាលខេត្តប៉ៃលិន ព្រមទាំងមានការអញ្ជើញចូលរួមពីសំណាក់ឯកឧត្តម លោកជំទាវ សមាជិកក្រុមប្រឹក្សាខេត្ត ឯកឧត្តម លោកជំទាវអភិបាលរងខេត្ត និងលោក-លោកស្រីថ្នាក់ដឹកនាំមន្ទីរ កងកំលាំងប្រដាប់អាវុធគ្រប់លំដាប់ថ្នាក់ លោកអភិបាលក្រុង/ស្រុក ព្រមទាំងលោកមេឃុំ ចៅសង្កាត់ ផងដែរ។
ឯកឧត្តម ផាន់ ចាន់ធុល អភិបាលនៃគណៈអភិបាលខេត្តប៉ៃលិនមានប្រសាសន៍ថាៈ ក្នុងឆ្នាំ២០១៨ នេះរដ្ឋបាលខេត្តកំពុងយកចិត្តទុកដាក់ខិតខំជំរុញការងារដំឡើងតួនាទី ភារកិច្ចជូនដល់មន្រ្តីរាជនៅតាមអង្គភាព ស្ថាប័នជំនាញជុំវិញខេត្ត ស្របតាមច្បាប់គតិយុទ្ធរបស់មន្រ្តីរាជការ ក្នុងន័យលើកទឹកចិត្ត និងបង្កើនប្រសិទ្ធិភាពការងារផ្តល់សេវាសាធារណៈ និងការដោះស្រាយបញ្ហាប្រឈមនានាជូនប្រជាពលរដ្ឋនៅមូលដ្ឋាន និងជាពិសេសចូលរួមអភិវឌ្ឍន៍ខេត្តអោយមានការរីកចំរើនបន្ថែមទៀត។ ឯកឧត្តម ក៏បានមានប្រសាសន៍ជំរុញអោយមន្រ្តីដែលទើបទទួលបានការតែងតាំង និងផ្លាស់ប្តូរភារកិច្ចថ្មីទាំងអស់ ត្រូវត្រូវខិតខំប្រឹងប្រែងធ្វើការងារ ទៅតាមបទដ្ឋាន និងតាមយុទ្ធសាស្រ្តនានា របស់រាជរដ្ឋាភិបាល និង ត្រូវប្រកាន់ខ្ជាប់នូវគោលការណ៍គ្រឹះនៃក្រមសីលធម៌ មន្រ្តីរាជការស៊ីវិល ប្រកាន់ខ្ជាប់នូវតួនាទី និងភារកិច្ចស្នូលរបស់ខ្លូន ប្រកាន់ខ្ជាប់នូវឥរិយាការងារទន់ភ្លន់ ម៉ឺងម៉ាត់ មានការទទួលខុសត្រូវ មានភាពស្មោះត្រង់ មានតម្លាភាព មានសាមគ្គីភាពផ្ទៃក្នុងអោយបានរឹងមាំ ហើយត្រូវធ្វើការលើកទឹកចិត្តដល់មន្រ្តី និងបុគ្គលិកក្រោមឱវាទ។
សូមបញ្ជាក់ថា៖ មន្រ្តីដែលបានប្រកាសចូលកាន់មុខតំណែង និងផ្លាស់ប្តូភារកិច្ចទាំង៤ មន្ទីរនេះ សរុបមាន ចំនួន២៥រូប ក្នុងនោះមន្ទីរមុខងារសាធារណៈខេត្ត ចំនួន៦រូប, មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តប៉ៃលិន ចំនួន ៥រូប, មន្ទីរសុខាភិបាលខេត្តចំនួន ០៥រូប និង មន្ទីរកសិកម្ម រុក្ខាប្រមាញ់ និងនេសាទខេត្ត ចំនួន ០៦រូប ៕ ពិនិត្យ កែសម្រួល៖ វួច ពឿន
