ថ្ងៃសៅរ៍ ៤កើត ខែអស្សុជ ឆ្នាំច សំរឹទ្វិស័ក ព.ស២៥៦២ ត្រូវនឹងថ្ងៃទី១៣ ខែតុលា ឆ្នាំ២០១៨ កម្លាំងនគរបាលនៃអធិការក្រុងប៉ៃលិន សហការជាមួយកម្លាំងនគរបាលប៉ុស្តិ៍សង្កាត់ទួលល្វា និងប៉ុស្តិ៍សង្កាត់អូរតាវ៉ៅ បានចុះស្រាវជ្រាវ និងចាប់ឃាត់ខ្លួនជនសង្ស័យម្នាក់ជាចោរលួចម៉ូតូ តាមពាក្យបណ្ដឹងពីជនរងគ្រោះឈ្មោះ រិន វីរៈ ភេទ ប្រុស អាយុ ១៨ឆ្នាំ រស់នៅភូមិថ្មី សង្កាត់ទួលល្វា ក្រុងប៉ៃលិន ខេត្តប៉ៃលិន។
លោកវរសេនីយ៍ត្រី យ៉ែម សារិទ្ធិ អធិការនគរបាលក្រុងប៉ៃលិន បានឱ្យដឹថា ដោយមានពាក្យបណ្តឹងពីជនរងគ្រោះ កាលពីថ្ងៃទី១៧ ខែកញ្ញា ឆ្នាំ២០១៨ អំពីករណីចោរលួចម៉ូតូមួយគ្រឿង ម៉ាក HONDA DREAM C125 សេរីឆ្នាំ២០១៤ ពណ៌ខ្មៅ ពាក់ស្លាកលេខប៉ៃលិន 1B-2201, កំលាំងរបស់លោកបានធ្វើការតាមដាន ស្រាវជ្រាវ កំណត់មុខសញ្ញាជនល្មើស ដើម្បីចាប់ឃាត់ខ្លួនផ្ទន្ទាទោសតាមច្បាប់។ លោកបានបន្តថា លុះដល់វេលាម៉ោង ១៣:៣០នាទី, ថ្ងៃសៅរ៍ ៤កើត ខែអស្សុជ ឆ្នាំច សំរឹទ្វិស័ក ព.ស២៥៦២ ត្រូវនឹងថ្ងៃទី១៣ ខែតុលា ឆ្នាំ២០១៨, ដោយមានការរាយការណ៍ពីប្រជាការពារភូមិ, រូបលោក បានដឹកនាំកំលាំងនគរបាលនៃអធិការដ្ឋាននគរបាក្រុងប៉ៃលិន, កម្លាំងនគរបាលប៉ុស្តិ៍សង្កាត់ទួលល្វា និងប៉ុស្តិ៍សង្កាត់អូរតាវ៉ៅ ព្រមជាមួយប្រជាការពារភូមិ បានចុះឃាត់ខ្លួនជនសង្ស័យម្នាក់ឈ្មោះ ប៉ាត ភន ភេទប្រុស អាយុ ៣៧ឆ្នាំ មុខរបរ ធ្វើចំការ រស់នៅភូមិថ្មី សង្កាត់ទួលល្វា ក្រុងប៉ៃលិន ខេត្តប៉ៃលិន ដើម្បីមកផ្តន្ទាទោសតាមច្បាប់។
សូមបញ្ជាក់ថា ករណីបាត់ម៉ូតូនេះ គឺនៅចំណុចភូមិថ្មី សង្កាត់ទួលល្វា ក្រុងប៉ៃលិន ខេត្តប៉ៃលិន នាថ្ងៃទី១៧ ខែកញ្ញា ឆ្នាំ២០១៨ និងបានចាប់ឃាត់ខ្លួនជនសង្ស័យបាននាថ្ងៃទី១៣ ខែតុលា ឆ្នាំ២០១៨ នៅចំណុចភូមិព្រៃមង្គល សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដោយរួមជាមួយម៉ូតូមួយគ្រឿងដែលជនសង្ស័យលួចយកទៅ ផងដែរ។៕ ដោយ៖ វួច ពឿន
