ថ្ងៃសុក្រ ១០កើត ខែអស្សុជ ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី១៩ ខែតុលា ឆ្នាំ២០១៨ ឯកឧត្តម ផាន់ ចាន់ធុល អភិបាលខេត្តប៉ៃលិន រួមដំណើរដោយឯកឧត្តម ហែម ឫទ្ធី អភិបាលរងខេត្ត លោក អ៊ុន ប៊ុនលី នាយករដ្ឋបាលសាលាខេត្ត និងថ្នាក់ដឹកនាំ មន្ត្រីរាជការមន្ទីរអភិវឌ្ឍន៍ជនបទខេត្ត ព្រមទាំងក្រុមការងារមួយចំនួនទៀត បានអញ្ជើញចុះសំណេះសំណាលសួរសុខទុក្ខ និងនាំយកអំណោយជាសម្ភាៈទឹកស្អាត មកចែកជូនដល់ប្រជាប្រពលរដ្ឋចំនួន ១៥០គ្រួសារ នៅក្នុងស្រុកសាលាក្រៅ ដែលទទួលរងគ្រោះដោយសារ ជំនន់ទឹកភ្លៀងនាពេលកន្លងមក។
មានប្រសាសន៍សំណេះសំណាល នាឱកាសនោះ ឯកឧត្តម ផាន់ ចាន់ធុល អភិបាលខេត្តប៉ៃលិន បានណែនាំអោយប្រជាពលរដ្ឋមានការប្រុងប្រយ័ត្នថែទាំសុខភាពអោយបានល្អ ព្រោះក្រោយពីទឹកបានស្រកទៅ នឹងមានមេរោគជាច្រើនអាចបង្កជាជំងឺផ្សេងៗ ពិសេសជំងឺរាគរូស ដែលបង្កពីទឹកមិនស្អាត។ ឯកឧត្តមបានមានប្រសាសន៍ថា សុខភាពជាបញ្ហាចំបង ជាទ្រព្យសម្បត្តដ៏មានតម្លៃរបស់ប្រជាពលរដ្ឋ។ បញ្ហាសុខុមាលភាពរបស់ប្រជាពលរដ្ឋនេះ ត្រូវបានរាជរដ្ឋាភិបាលកម្ពុជា ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី មានការយកចិត្តទុកដាក់ខ្ពស់ ធ្វើយ៉ាណាអោយប្រជាពលរដ្ឋកម្ពុជាយើងមានសុខភាពល្អ ពិសេសនៅតំបន់ជនបទ។ ឯកឧត្តមបានបន្តថា ការចែកជូននូវសម្ភារៈប្រើប្រាស់ទឹកស្អាតនាពេលនេះ គឺជាការរួមចំណែកមួយយ៉ាងសំខាន់ជាមួយរាជរដ្ឋាភិបាល ក្នុងការលើកកំពស់អនាម័យ និងសុខភាព របស់ប្រជាពលរដ្ឋក្នុងស្រុកសាលាក្រៅ ដែលរងផលប៉ះពាល់ដោយជំនន់ទឹកភ្លៀងកន្លងមក, សំរួលដល់ការលំបាកខ្វះខាតរបស់បងប្អូនប្រជាពលរដ្ឋយើង។ ឯកឧត្តម ក៏បានណែនាំដល់ប្រជាពលរដ្ឋទាំងអស់ត្រូវមានការប្រុងប្រយ័ត្នជាមួយបញ្ហាគ្រោះធម្មជាតិ ដូចជា រន្ទះបាញ់ ទឹកជំនន់ ខ្យល់កន្រ្តាក់ជាដើម ព្រោះនេះជារដូវភ្លៀង ងាយរងនូវផលប៉ះពាល់លើបញ្ហាទាំងអស់នេះ។
សូមបញ្ជាក់ថា សម្ភារៈទឹកស្អាតដែលអាជ្ញាធរខេត្ត នាំយកទៅចែកជូនដល់ប្រជាពលរដ្ឋទាំង១៥០គ្រួសារនេះ រួមមាន៖ ធុងចម្រោះទឹកស្អាតចំនួន ២៩, ធុងជ័រចំណុះ២០លីត្រ ចំនួន១៥០, ប៊ីដុងជ័រចំណុះ២០លីត្រ ចំនួន១២១, ប៊ីដុងជ័របត់ចំណុះ២០លីត្រ ចំនួន១២១, សាប៊ូម្សៅ ចំនួន ១២១គីឡូក្រាម, សាប៊ូដុំ ចំនួន ១២១ដុំ និងក្លរបោកគក់ ចំនួន១២១ដប ផងដែរ៕ ដោយ៖ វួច ពឿន
