ថ្ងៃទី០៣ ខែកញ្ញា ឆ្នាំ២០១៨ ឯកឧត្តម ផាន់ ចាន់ធុល អភិបាលខេត្តប៉ៃលិន អមដំណើរដោយលោកជំទាវ សោ មុន្នីរ័ត្ន អភិបាលរងខេត្ត ព្រមទាំងមន្រ្តីរាជការអមដំណើរមួយចំនួនទៀត បានអញ្ជើញព្រលែងពោះថ្លាន់ ១ក្បាល ទម្ងន់ជាង ១០គីឡូក្រាម អោយទៅរស់នៅក្នុងព្រៃធម្មជាតិ តំបន់អភិរក្សធនធានធម្មជាតិ ប្រើប្រាស់ច្រើនយ៉ាង សំឡូត-ប៉ៃលិនវិញ។
ឯកឧត្តម ផាន់ ចាន់ធុល អភិបាលខេត្តប៉ៃលិន បានមានប្រសាសន៍ថា៖ ពស់ថ្លាន់ ១ក្បាលនេះ គឺជាប្រភេទពស់ថ្លាន់ក្រឡាហូល ពណ៌មាស មានទម្ងន់ជាង ១០គីឡូក្រាម ដែលមន្ត្រីឧទ្យាននុរក្ស នៃមន្ទីរបរិស្ថានខេត្ត ទទួលបានពីប្រជាពលរដ្ឋល្អ រស់នៅភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន។ ឯកឧត្តម ផាន់ ចាន់ធុល បានមានប្រសាសន៍បន្តថា៖ បច្ចុប្បន្ន សត្វព្រៃបានកំពុងរងការគំរាមកំហែងដោយសារការបាត់បង់ជម្រក ដែលបណ្ដាលមកពីបទល្មើសកាប់ព្រៃឈើខុសច្បាប់ ការដាក់អន្ទាក់ និងការបរបាញ់សត្វព្រៃខុសច្បាប់ជាដើម។ ដូច្នេះ សូមអោយប្រជាពលរដ្ឋ មន្ត្រីរាជការ និងស្ថាប័នពាក់ព័ន្ធទាំងអស់ត្រូវ រួមគ្នាការពារសត្វព្រៃ ពិសេសមិនត្រូវបរិភោគសាច់សត្វព្រៃនោះឡើយ៕
