នៅព្រឹកថ្ងៃទី៥ ខែកញ្ញា ឆ្នាំ ២០១៨ ក្រុមប្រឹក្សាខេត្តប៉ៃលិនបានបើកកិច្ចប្រជុំសាមញ្ញ លើកទី៥២ អាណត្តិទី២របស់ខ្លួន ដែលកិច្ចប្រជុំនេះស្ថិតក្រោមអធិបតីភាព ឯកឧត្តម ឡី ចាន់ឆាយ ប្រធានក្រុមប្រឹក្សាខេត្ត ឯកឧត្តម ផាន់ ចាន់ធុល អភិបាលនៃគណៈអភិបាល ខេត្តប៉ៃលិន និងមានការអញ្ជើញចូលរួម ពីសំណាក់សមាជិកក្រុមប្រឹក្សាខេត្ត អភិបាលរងខេត្ត អភិបាល ក្រុង/ស្រុក ប្រធាន- អនុប្រធានមន្ទីរស្ថាប័នជំវិញខេត្ត លោកមេឃុំ ចៅសង្កាត់ និងតំណាង កងកំលាំងប្រដាប់អាវុធទាំង៣ស្ថាប័ន ផងដែរ។
កិច្ចប្រជុំក្រុមប្រឹក្សាខេត្តដើម្បី៖ទី១/ ពិនិត្យ និងអនុម័តរបៀបវារៈកិច្ចប្រជុំសាមញ្ញលើកទី៥២។ ទី២/ ពិនិត្យ និងអនុម័តកំណត់ហេតុកិច្ចប្រជុំសាមញ្ញលើកទី៥១។ ទី៣/ពិនិត្យ និងអនុម័តរបាយការណ៏ ស្តីពីការអនុវត្តការងាររបស់រដ្ឋបាលខេត្តប្រចាំខែសីហា ២០១៨ និង ទី៤/ បញ្ហាផ្សេងៗ។
បន្ទាប់ពីតំណាងរដ្ឋបាលខេត្តបានអាន របាយការណ៏ ស្តីពីការអនុវត្តការងាររបស់រដ្ឋបាលខេត្តប្រចាំខែសីហា ២០១៨ រួចមក, សមាជិកនៃអង្គប្រជុំ ក៏បានលើកឡើងអំពីបញ្ហាប្រឈមនានាដើម្បីពិនិត្យ និង ធ្វើការដោះស្រាយរួមមាន៖ទី១/បញ្ហាការធ្វើរបាយការណ៏នៅតាមអង្គភាពមន្ទីរជំនាញមួយចំនួននៅមានភាពយឺតយ៉ាវខ្លាំង។ទី២/បញ្ហារថយន្តធ្វើអាជីវកម្មដឹកដី ធ្វើអោយធ្លាក់មកលើផ្លូវបណ្តាលអោយខូចខាតផ្លូវ និង រថយន្តធនធំបើកលឿន និង ដឹកលើសទម្ងន់ធ្វើប៉ះពាល់ដល់បងប្អូនប្រជាពលរដ្ឋធ្វើដំណើរតាមផ្លូវសាធារណៈ។ទី៣/ប្រជាពលរដ្ឋនៅតែបោះចោលសំរាមចូលទៅក្នុងលូដែលបណ្តាលអោយស្ទះលូ។ ទី៤/បញ្ហាការធ្វើ ប័ណ្ណព្រំដែនមិនទាន់ច្បាស់លាស់។ ទី៥/បញ្ហាឃុំស្ទឹងត្រង់ នៅបណ្តាភូមិខ្លះមិនទាន់មានការតភ្ជាប់ បណ្តាញភ្លើងអគ្គីសនីជូនប្រជាពលរដ្ឋប្រើប្រាស់នៅឡើយ។ទី៦ /បញ្ហាការបង់ពន្ធពីការផ្ទេរកម្មសិទ្ធិ ធ្វើមិនទាន់បានតាមផែនការ។ ទី៧/អំពីបញ្ហាការជួញដូប្រើប្រាស់គ្រឿងញៀននៅតែមាននៅតាមមូលដ្ឋានមួយចំនួន និងទី៨/មានជនមិនស្គាល់មុខធ្វើការកាយយកដីពីភ្នំធ្វើអោយប៉ះពាល់ដល់ធនធានព្រៃឈើ ភ្នំរបស់រដ្ឋ។
ឯកឧត្តម ផាន់ចាន់ ធុល អភិបាលខេត្តប៉ៃលិនបានមានប្រសាសន៏ថា៖ បញ្ហាដែលសមាជិកនៃកិច្ចប្រជុំបានលើកឡើងនៅពេលនេះ រដ្ឋបាលខេត្តនឹងខិតខំយកចិត្តទុកដាក់ ជំរុញដល់មន្ទីរជំនាញ និង អង្គភាពដែលជាប់ពាក់ព័ន្ធទាំងអស់ ប្រឹងប្រែងដោះស្រាយអោយបាន, ក្នុងន័យកែលំអ និងបំរើសេវាជូនប្រជាពលរដ្ឋអោយបានល្អប្រសើ។ ឆ្លៀតក្នុងឱកាសនោះ ឯកឧត្តម ផាន់ចាន់ ធុល ក៏បានស្នើរមន្ទីរ អង្គភាព ជំនាញ និងអាជ្ញាធរក្រុង/ស្រុកទាំងអស់ ត្រូវខិតខំថែរក្សាការពារព្រៃឈើ និង ភ្នំ អោយបានគង់វង្ស និង ត្រូវមានឆន្ទះ ស្មារី សាមគ្គី សហការគ្នាអោយបានល្អ ខិតខំអនុវត្តការងារអោយបានហ្មត់ច្មត់ ជាពិសេសមន្ទីរ អង្គភាពជំនាញត្រូវសហការជាមួយរដ្ឋបាលខេត្ត ក្នុងការចូលរួមដោះស្រាយបញ្ហានានា ទៅតាម សេចក្តីត្រូវការរបស់បងប្អូនប្រជាពលរដ្ឋអោយបានទាន់ពេលវេលា។
ឯកឧត្តម ឡី ចាន់ឆាយ ប្រធានក្រុមប្រឹក្សាខេត្តប៉ៃលិនបានមានប្រសាសន៍កោតសសើរដល់រដ្ឋ បាលខេត្តប៉ៃលិន ដែលបានខិតខំប្រឹងប្រែងបំពេញការងារ និងដោះស្រាយរាល់បញ្ហាប្រឈមនានាដែលកើតមានឡើងកន្លងមក ទទួលបានលទ្ធផលល្អ ជាពិសេសបានយកចិត្តទុកដាក់ ពង្រឹងកិច្ចការពារសន្តិសុខ សណ្តាប់ធ្នាប់សង្គមបានល្អ និងអភិវឌ្ឍន៍ខេត្តប៉ៃលិនអោយមានការរីកចំរើនជាបន្តបន្ទាប់។ ឯកឧត្តមក៏បានស្នើរ ដល់រដ្ឋបាលខេត្ត និងមន្ទីរស្ថាប័នជំវិញខេត្ត ត្រូវបន្តខិតខំរួមគ្នាធ្វើការដោះស្រាយបញ្ហា រាល់ទុកកង្វល់ និងសំនូមពរពីបងប្អូនប្រជាពលរដ្ឋអោយបានល្អ។ ចំពោះបញ្ហាប្រជាពលរដ្ឋ នៅតែចោលសំរាមចូលក្នុងលូ, រដ្ឋបាលក្រុង មន្ទីរអង្គភាពពាក់ព័ន្ធត្រូវចុះត្រួតពិនិត្យ ដោះស្រាយអោយបានទាន់ពេលវេលា។ ទន្ទឹមនេះ ឯកឧត្តមក៏បានសំនូមពរដល់ថ្នាក់ដឹកនាំមន្ទីរកសិកម្ម និង មន្ត្រីជំនាញត្រូវពន្យល់ណែនាំពីបច្ចេកទេសដាំដុះដល់កសិកអោយយល់កាន់ច្បាស់ ក្នុងន័យលើកកម្ពស់ជីវភាពរបស់បងប្អូនប្រជាពលរដ្ឋ៕
