ថ្ងៃទី០៥ ខែតុលា ឆ្នាំ២០១៨ ក្រុមការងារគណបក្សប្រជាជនកម្ពុជាចុះជួយភូមិព្រៃសន្ទះ និងភូមិផ្ទះស្បូវ ដឹកនាំដោយលោក អ៊ិត ពេន ជាប្រធានក្រុមការងារ, បានចុះសួសុខទុក្ខ និងនាំយកនូវអំណោយមួយចំនួន ទៅចែកជូនសមាជិក សមាជិការបក្ស ចំនួន ១២គ្រួសារ ដែលរងគ្រោះដោយខ្យល់កន្រ្តាក់ នៅក្នុងភូមិព្រៃសន្ទះ និងភូមិផ្ទះស្បូវ ក្នុងឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
គ្រួសារបក្សដែលរងគ្រោះដោយខ្យល់កន្រ្តាក់ មកទទួលអំណោយនាពេលនោះ រួមមាន៖ ក្នុងមួយគ្រួសារៗ ទទួលបានអង្ករ ២៥ គីឡូក្រាម។ ដោយឡែកគ្រួសារ លោក ដឹក ប៊ុន ធឿន ទទួលបានអង្ករ៥០ គីឡូក្រាម, ចំណែកគ្រួសារលោកស្រី ថុន ច្រឹប ទទួលបានអង្ករ៥០ គីឡូក្រាម និងថវិកា៨០០០០រៀល បន្ថែមទៀតផងដែរ ដោយសារគ្រួសារទាំងពីរនេះទទួលរងការខូចខាតធ្ងន់ធ្ងរជាងគេ។
លោក អ៊ឹត ពេន ប្រធានក្រុមការងារគណបក្សប្រជាជនកម្ពុជាចុះជួយភូមិព្រៃសន្ទះ និងភូមិផ្ទះស្បូវ បានមានប្រសាសន៍ថា៖ ការចុះសួរសុខទុក្ខ និងនាំយកនូវអំណោយមកចែកជូនដល់សមាជិក សមាជិការបក្ស ដែលរងគ្រោះដោយធម្មជាតិ ឬ ដោយជីវភាពទីទាល់ក្រនេះ គឺជា ប្រពៃណីរបស់គ្រួសារគណបក្សប្រជាជនកម្ពុជា។ គណបក្សប្រជាជនកម្ពុជានៅជាមួយប្រជាជន បំរើប្រជាជន និងតែងតែជួយដល់ប្រជាជនគ្រប់ពេលវេលា ។ ទីណាមានទុក្ខលំបាក តែងមានថ្នាក់ដឹកនាំគណបក្សប្រជាជនកម្ពុជាចុះជួយឧបត្ថម្ភ ជ្រោមជ្រែង មិនអោយប្រជាពលរដ្ឋណាម្នាក់រងទុក្ខលំបាក ដោយមិនមានការជួយសង្គ្រោះនោះឡើយ៕ ដោយ វួច ពឿន
